மணிவாசகத்தின் உடலை சொந்த ஊரில் அடக்கம் செய்ய பொதுமக்கள் எதிர்ப்பு!

சேலம்: கேரளாவில் சுட்டுக்கொல்லப்பட்ட மாவோயிஸ்ட் மணிவாசகத்தின் சடலத்தை அடக்கம் செய்ய ஊருக்குள் எடுத்து வரக்கூடாது என ஊர் மக்கள் எதிர்ப்பு தெரிவித்துள்ளதால் பரபரப்பு ஏற்பட்டுள்ளது.

கேரள காட்டுப்பகுதியில் கடந்த மூன்று தினங்களுக்கு முன்பு மாவோயிஸ்ட் இயக்கத்தைச் சேர்ந்த நான்கு பேர் சுட்டுக் கொல்லப்பட்டனர். இவர்களில் ஒருவர் மணிவாசகம் (57). இவரின் சொந்த ஊர் சேலம் மாவட்டம் தீவட்டிப்பட்டி அருகே உள்ள ராமமூர்த்தி நகர். மணிவாசகம் கேரள காட்டுப்பகுதியில் சிலருக்கு துப்பாக்கி சுடும் பயிற்சி அளித்து வந்ததாகவும், அப்போது அவர் சுட்டுக் கொல்லப்பட்டதாகவும் தகவல்கள் வெளியானது.

இதுகுறித்து மணிவாசகத்தின் தங்கை லட்சுமிக்குத் தகவல் தெரிவிக்கப்பட்டதையடுத்து, நேற்றுமுன் தினம் கேரளா சென்று மணிவாசகத்தின் உடலைப் பெற்று சொந்த ஊருக்கு கொண்டு வந்தார். இந்நிலையில், ராமமூர்த்தி நகர் பொதுமக்கள் ஒன்றுகூடி மாவோயிஸ்ட் மணிவாசகத்தின் சடலத்தை ஊருக்குள் கொண்டு வரக் கூடாது என முடிவு செய்து எதிர்ப்புத் தெரிவித்தனர்.

இதனால், ஊருக்கு அருகில் உள்ள மணிவாசகத்திற்கு சொந்தமான நிலத்தில் சடலத்தை அடக்கம் செய்ய உறவினர்கள் ஏற்பாடு செய்துள்ளனர். இதனைத் தொடர்ந்து, வருவாய்த்துறை அலுவலர்கள் அப்பகுதி நிலவரத்தை கண்காணித்து வருகிறார்கள்.

இதையும் படிங்க: மாவோயிஸ்ட் மணிவாசகத்தின் உடலைப் பெற கேரளா செல்லும் அவரது தங்கை!