சேலம் மாவட்டம் வாழப்பாடி அருகே மலையடிவாரத்தில் கள்ளத் துப்பாக்கிகள் தயாரிக்கும் தொழிற்சாலை சில நாட்களுக்கு முன்பு கண்டுபிடிக்கப்பட்டது. இதனைத் தொடர்ந்து சேலம் மலைக் கிராமங்களில் சட்ட விரோதமாக கள்ளத்துப்பாக்கிகள் புழக்கம் அதிகளவில் இருப்பதாக காவல்துறை உயரதிகாரிகளுக்கு தகவல் கிடைத்தது.
பின்னர் மாவட்ட காவல் கண்காணிப்பாளர் தீபா கானீகேர் தலைமையில் நூற்றுக்கும் மேற்பட்ட காவலர்கள், வருவாய்துறை அலுவலர்கள் மற்றும் வனத்துறையினர் இணைந்து இன்று காலை கருமந்துறை மலைக் கிராமங்களில் சோதனை நடத்தினர். கிட்டதட்ட 27-க்கும் மேற்பட்ட மலைக் கிராமங்களில் நடைபெற்ற இந்தச் சோதனையில், புதரில் மறைத்து வைக்கப்பட்டிருந்த மூன்று நாட்டுத்துப்பாக்கிகள் பறிமுதல் செய்யப்பட்டன. இதுதொடர்பாக அப்பகுதியினரிடையே காவல்துறையினர் விசாரணை மேற்கொண்டு வருகின்றனர்.