கூட்டணி தர்மம் திமுகவிற்கு இல்லை - ஜி.கே. மணி

சேலம்: மாபெரும் இலவச பொதுமருத்துவ முகாமை தொடங்கிவைத்த பாமக மாநிலத் தலைவர் ஜிகே மணி, கூட்டணி தர்மம் என்பது திமுகவிற்கு இல்லை என செய்தியாளர்கள் சந்திப்பில் கூறியுள்ளார்.

சேலம் மாவட்டம் ஓமலூர் பாத்திமா மகளிர் மேல்நிலைப்பள்ளியில் சேலம் மேற்கு மாவட்ட பசுமைத் தாயகமும் சுரக்ஸா மல்டி ஸ்பெஷாலிட்டி மருத்துவமனையும் இணைந்து நடத்திய மாபெரும் இலவச பொதுமருத்துவ முகாம் இன்று நடைபெற்றது.

இதில் பாமக மாநிலத் தலைவர் ஜி.கே. மணி கலந்துகொண்டு முகாமை தொடங்கிவைத்தார். இந்த முகாமில், எலும்பு முறிவு, மூட்டு பரிசோதனைகள், கர்ப்பப்பை, சிறுநீரகக் கல், மூட்டு வலி உள்ளிட்ட நோய்களுக்கான சிறப்பு பரிசோதனைகள் பார்க்கப்பட்டன. மேலும், கண்பார்வை குறைபாடு, தூரப்பார்வை, கிட்டப்பார்வை உள்ளவர்களுக்கும் பரிசோதனை செய்யப்பட்டது.

பின்னர், செய்தியாளர்களைச் சந்தித்த ஜி.கே. மணி கூறுகையில், “ஊரக உள்ளாட்சித் தேர்தலில் காங்கிரசுக்கு திமுக ஒரு இடம்கூட கொடுக்கவில்லை என அழகிரி பகிரங்கமாகப் பேட்டியளித்த காரணமாக அக்கூட்டணியில் பிளவு என ஊடகங்களில் வெளியானது.

இதைத்தொடர்ந்து அதை மறைக்க அழகிரி, ஸ்டாலின் சந்திப்பு நடைபெற்றது. கூட்டணி தர்மம் என்பது பெரிய கட்சி, சிறிய கட்சி என்று பாகுபாடு பார்க்கக் கூடாது. பெரிய கட்சிகள் சிறிய கட்சிகளுக்கு ஆதரவு கொடுக்க வேண்டும் இதுவே கூட்டணி தர்மம். ஸ்டாலினை சந்தித்த அழகிரி பேட்டியளித்தது குறித்து எண்ணிப்பார்க்கும்போது கூட்டணி தர்மம் திமுகவிற்கு இல்லை என்பது தெரிகிறது.

நம்முடைய கூட்டணியால் மட்டுமே அதிமுக அபார வெற்றிபெற்றுள்ளது என்று அன்புமணி கூறியது, பாமக உறுப்பினர்களை ஊக்குவிக்கும் நோக்கில் மட்டுமே அவ்வாறு பேசினாரே தவிர வேறு எந்த உள்நோக்கமும் இல்லை.

திரௌபதி படத்தின் முன்னோட்டம் கூட பார்க்கவில்லை, ஜனநாயக நாட்டில் அனைவருக்கும் பேச்சுரிமை, எழுத்துரிமை உள்ளது. ஆகவே படத்தின் மூலம் கருத்து சொல்வதற்கு எல்லோருக்கும் உரிமை உண்டு, அதை தடுப்பதற்கு யாருக்கும் உரிமை கிடையாது.

ஒருவர் ஆதரவான கருத்துகளை மட்டுமே ஏற்றுக்கொள்ளக் கூடாது, எதிரான கருத்துகளையும் ஏற்றுக்கொள்ள வேண்டும். அந்த மனப்பக்குவத்தை உருவாக்கிக் கொள்ள வேண்டும்” எனத் தெரிவித்தார்.

இதையும் படிங்க: ‘யோக்கியர் என்றால் துக்ளக் ஆதாரத்தைக் காட்டியிருக்க வேண்டும்’ - கொளத்தூர் மணி காட்டம்