மதுபாட்டிலுக்கு ரூ. 30 குறைவாக கொடுத்த குடிமகன் அடித்துக் கொலை!

சேலம்: கள்ளத்தனமாக மதுவை விற்றுவந்த மது வியாபாரி, மதுபாட்டிலுக்கு ரூ. 30 குறைவாகக் கொடுத்தவரை அடித்துக் கொலை செய்த சம்பவம் அதிர்ச்சியை ஏற்படுத்தியுள்ளது.

சேலம் அடுத்த உடையாப்பட்டி அருகே உள்ளது தாதம்பட்டி காலனி. இங்கு திலீப் என்பவர் நடத்திவந்த கள்ளத்தனமான மதுக்கடைக்கு, கக்கன் காலனியைச் சேர்ந்த சதீஷ் மது வாங்கச் சென்றுள்ளார். அப்போது ரூ. 130 விலையுள்ள மது பாட்டிலுக்கு ரூ. 100 மட்டுமே தருவதாகக் கூறி சதீஷ் திலீப்பிடம் தகராறில் ஈடுபட்டுள்ளார்.

இதில் ஆத்திரமடைந்த திலீப் 10 பேர் கொண்ட கும்பலுடன் சதீஷ் வீட்டிற்குச் சென்று அவரை கடுமையாக தாக்கியுள்ளார். இந்தத் தாக்குதலில் சதீஷ் சம்பவ இடத்திலேயே பரிதாபமாக உயிரிழந்தார். சதீஷ் தாயாரும் இந்தத் தாக்குதலில் படுகாயமடைந்துள்ளார். தற்போது அவர் சேலம் அரசு மருத்துவமனையில் சிகிச்சை பெற்றுவருகின்றார்.

இதைக் கண்டித்து அப்பகுதி மக்கள் இன்று காலை அரூர் பிரதான சாலையில் சாலை மறியலில் ஈடுபட்டனர். இக்கொலைச் சம்பவத்திற்கு காரணமான திலீப்பை உடனடியாக கைது செய்ய வேண்டும் என்று முழக்கங்களை எழுப்பினர். தகவலறிந்து அங்கு வந்த காவல் துறையினர் போராட்டத்தில் ஈடுபட்டவர்களை தடுத்து நிறுத்தினர்.

இதையடுத்து திலீப் கள்ளத்தனமாக நடத்திவந்த மதுக் கடைக்குச் சென்ற பொதுமக்கள் அங்கு பதுக்கி வைக்கப்பட்டிருந்த மதுபாட்டில்களை அடித்து நொறுக்கினர். கொலைச் சம்பவம், கடை அடித்து நொறுக்கப்பட்டது குறித்து வழக்குப்பதிவு செய்த காவல் துறையினர் விசாரணை மேற்கொண்டுவருகின்றனர்.