சேலத்தில் சிறை கைதிகளுக்கு புதுவாழ்வு அழிக்கும் திட்டம்!

சேலம்: சிறை கைதிகள் தயாரிக்கும் பன் வகைகளை அரசு மருத்துவமனைக்கு விற்பனை செய்ய முயற்சி எடுக்கப்பட்டுள்ளது.

சிறைகளில் உள்ள கைதிகளுக்கு மறுவாழ்வு ஏற்படுத்தித் தர சிறைத் துறை நிர்வாகம் ஏற்பாடு செய்துவருகிறது. அதன்படி தமிழ்நாடு சிறைகளில் கைதிகளுக்கு பல்வேறு தொழில்கள் கற்றுத்தரப்படுகிறது.

அந்த வகையில், சேலம் மத்திய சிறையில், கைதிகள் பிரட் தயாரிக்க சிறிய தொழிற்சாலை ஒன்று சிறைக்குள் நிறுவப்பட்டுள்ளது. தற்போது இந்த பிரட் தொழிற்சாலை தொடங்கப்பட்டு தினமும் கைதிகள் மூலம் பிரட், பன், தேங்காய் பன் தயாரிக்கப்பட்டுவருகிறது. இவையனைத்தும் சிறைக்கு வெளியில் உள்ள சிறைக் கடையில் வைத்து விற்கவும் ஏற்பாடு செய்யப்பட்டுள்ளது. அதில் ஒரு பன் 5 ரூபாய்க்கும் பிரட் வகைகள் 25 ரூபாய்க்கும் தேங்காய் பன் ரூபாய் 30-க்கும் விற்பனை செய்யப்படுகிறது. இந்த பன் வகைகளை வேறு கடைகளுக்கு சப்ளை செய்ய சேலம் மத்திய சிறை கண்காணிப்பாளர் தமிழ்ச்செல்வன், தமிழ்நாடு அரசுக்கு கோரிக்கை விடுத்திருந்தார்.

இதனையடுத்து இனி மாதந்தோறும் இரண்டு டன் பிரட்களை சேலம் அரசு தலைமை மருத்துவமனைக்கு வழங்க உத்தரவிட்டிருக்கிறது. 200 கிராம் ரூ.12.50-க்கு விற்க விலை நிர்ணயம் செய்யப்பட்டுள்ளது. இதன்மூலம் இனி மாதந்தோறும் ஒரு லட்சத்து 25 ஆயிரம் ரூபாய் வருமானம் சேலம் மத்திய சிறைக்கு கிடைக்க உள்ளது. இந்த வருமானத்தில் பிரட், பன் தயாரிக்கும் கைதிகளுக்கு ஒரு தொகை வழங்கவும் சிறை நிர்வாகம் உத்தரவிட்டுள்ளது. சேலம் கைதிகளுக்கு கிடைத்துள்ள இந்தப் புது முயற்சிக்கு பலரும் பாராட்டும் தெரிவித்துவருகிறார்கள்.