சேலம் அருகே மனைவியைக் கொன்றுவிட்டு கணவன் தற்கொலை!

சேலம் : திருமணமான 32ஆவது நாளில் மனைவியைக் கொன்றுவிட்டு கணவன் தற்கொலை செய்து கொண்ட சம்பவம் அதிர்ச்சியை ஏற்படுத்தியுள்ளது.

சேலம் மாவட்டம் மன்னார்பாளையம் கோராத்துப்பட்டி பகுதியை சேர்ந்தவர் தங்கராஜ் (33). அந்தப் பகுதியில் கேபிள் ஆப்பரேட்டராக வேலை செய்து வந்தார். இவருக்கும், சேலம் கோரிமேடு பகுதியைச் சேர்ந்த மோனிஷா (19) என்பவருக்கும் கடந்த 32 நாட்களுக்கு முன்னர் திருமணம் நடைபெற்றது.

இருவரும் கோராத்துக்காடு பகுதியில் வசித்து வந்தனர். திருமணம் நடந்தது முதல் தங்கராஜ் தனது மனைவி மோனிஷாவின் நடவடிக்கையில் அடிக்கடி சந்தேகப்பட்டு வந்ததாக கூறப்படுகிறது. அதனால் இருவருக்கும் இடையே தகராறு ஏற்பட்டு வந்துள்ளது.

நேற்று (ஏப்ரல் 6) இரவும் இருவருக்கும் இடையே மீண்டும் தகராறு ஏற்பட்டுள்ளது. அக்கம் பக்கத்தில் உள்ளவர்கள் இருவரையும் சமாதானப்படுத்தி உள்ளனர். இந்நிலையில், இன்று (ஏப்ரல் 7) காலை வெகுநேரமாகியும் மோனிஷாவின் வீட்டுக் கதவு திறக்கப்படாததால் சந்தேகமடைந்த அக்கம்பக்கத்தினர் வீட்டின் ஜன்னல் வழியாக எட்டிப் பார்த்துள்ளனர்.

அப்போது தங்கராஜ் கேபிள் ஒயரில் தூக்கில் தொங்கிய நிலையிலும், மோனிஷா தரையில் படுத்த நிலையிலும் உயிரிழந்து கிடந்துள்ளனர். இதனைத் தொடர்ந்து சுற்றியிருந்த பொதுமக்கள் அக்கம்பக்கத்தினருக்கு உடனடியாக காவல்துறையினருக்கு தகவல் தெரிவித்தனர். தகவலறிந்து சம்பவ இடத்திற்கு விரைந்து வந்த காவல் துறையினர் இருவரின் உடல்களையும் மீட்டு உடற்கூராய்வுக்காக அனுப்பி வைத்தனர்.

சந்தேகம் காரணமாக தங்கராஜ் தனது மனைவி மோனிஷாவை அடித்து கொலை செய்துவிட்டு, பின்னர் தானும் தற்கொலை செய்திருக்கலாம் என காவல்துறையினர் தெரிவித்துள்ளனர். உடற்கூராய்வுக்கு பின்னர் இருவரின் உடல்களும் உறவினர்களிடம் ஒப்படைக்கப்பட்டன.

இதையும் படிங்க : தேர்தல் நாளில் இந்திய யூனியன் முஸ்லீம் லீக் பூத் ஏஜெண்ட் கொலை!