சேலம் அரசு மருத்துவமனையில் உணவுப் பாதுகாப்புத் துறையினர் அதிரடி சோதனை!

சேலம்: அரசு மோகன் குமாரமங்கலம் மருத்துவமனை வளாகத்தில் இயங்கிவரும் தேநீர், சிற்றுண்டி கடைகளில் விற்பனைக்கு வைத்திருந்த தரமற்ற உணவு வகைகளை உணவுப் பாதுகாப்புத் துறை அலுவலர்கள் பறிமுதல் செய்தனர்.

சேலம் மாவட்டம் அரசு மோகன் குமாரமங்கலம் மருத்துவக் கல்லூரி மருத்துவமனை நாமக்கல், தருமபுரி, கிருஷ்ணகிரி ஆகிய நான்கு மாவட்டங்களுக்கு தலைமை மருத்துவமனையாகச் செயல்பட்டுவருகிறது. இங்கு நாள்தோறும் 10 ஆயிரத்திற்கும் மேற்பட்டோர் புறநோயாளிகள், இரண்டாயிரத்திற்கும் மேற்பட்டோர் உள்நோயாளிகளாக சிகிச்சைப் பெற்றுவருகின்றனர்.

இவர்களுக்காக மருத்துவமனை வளாகத்தில் பத்துக்கும் மேற்பட்ட தேநீர், சிற்றுண்டி கடைகள் செயல்பட்டுவருகின்றன. இந்தக் கடைகளில் நோயாளிகள், பொதுமக்களுக்கு தரமில்லாத உணவு வகைகள் விற்பனை செய்யப்படுவதாக மாவட்ட உணவுப் பாதுகாப்புத் துறை அலுவலர்களுக்கு புகார் வந்துள்ளது. இதையடுத்து உணவுப் பாதுகாப்புத் துறை மாவட்ட நியமன அலுவலர் கதிரவன் தலைமையில் ஐந்து பேர் கொண்ட குழுவினர் இன்று திடீர் ஆய்வு மேற்கொண்டனர்.

அப்போது, விற்பனைக்கு வைக்கப்பட்டுள்ள பொருள்களின் காலாவதி காலம், டீத்தூள், பலகாரத்திற்கு பயன்படுத்தப்படும் எண்ணெய், உணவு வகைகளின் தரம் உள்ளிட்டவற்றை அலுவலர்கள் ஆய்வு செய்தனர்.

ஆய்வின்போது தரமில்லாத உணவுப்பொருள்கள், தமிழ்நாடு அரசால் தடைசெய்யப்பட்ட நெகிழிப் பொருள்களை அலுவலர்கள் பறிமுதல் செய்தனர். மேலும் உணவுப் பாதுகாப்பு விதிமுறைகளை மீறினால் அவர்கள் மீது கடும் நடவடிக்கை எடுக்கப்படும் என அலுவலர்கள் எச்சரிக்கை விடுத்தனர்.

இதையும் படிங்க: சிறுமிக்கு காதுக்கு பதிலாகத் தொண்டையில் ஆப்பரேஷன்: மருத்துவர்கள் அலட்சியம்!