பைக் மீது மோதிய கார் - பதற வைக்கும் வீடியோ

சேலத்தில் இருசக்கர வாகனத்தின் மீது கார் மோதிய வீடியோ சமூக வலைதளங்களில் பரவி வருகிறது. இதுதொடர்பாக காவல் துறையினர் விசாரணை நடத்தி வருகின்றனர்.

சேலம்:மகுடஞ்சாவடி காளிகவுண்டம்பாளையம் தேசிய நெடுஞ்சாலையில் ஒரு இருசக்கர வாகனத்தில், இரண்டு இளைஞர்கள் சென்றுகொண்டிருந்தனர். அப்போது, அந்த வாகனத்தின் பின்னால் வந்த கார் ஒன்று இருசக்கர வாகனத்தை மோதிவிட்டு அங்கிருந்து தப்பியது.

பைக் மீது கார் மோதி விபத்து

இந்த காட்சிகள், இருசக்கர வாகனத்தின் பின்னால் வந்த மற்றொரு காரிலுள்ள கேமராவில் பதிவானது. இது சமூக வலைதளங்களில் வைரலாக பரவியதையடுத்து, மகுடஞ்சாவடி காவல் துறையினர் விசாரணை நடத்தினர்.

விசாரணையில், இருசக்கர வாகனத்தில் சென்றவர்கள், கள்ளக்குறிச்சி மாவட்டத்தைச் சேர்ந்த அருண், அஜித் என்பது தெரியவந்தது. இருவரும், பழனி சென்றுவிட்டு வீடு திரும்பிக்கொண்டிருந்தபோது, இந்த விபத்து ஏற்பட்டதும் விசாரணையில் தெரியவந்தது.

காவல் துறை விசாரணை

மேலும், விபத்து ஏற்படுத்திய காரின் பதிவு எண்ணை வைத்து, அது பெரம்பலூர் மாவட்டத்தைச் சேர்ந்தது என்பதை காவல் துறையினர் கண்டறிந்தனர்.

இச்சம்பவம் குறித்து வழக்குப்பதிவு செய்த காவல் துறையினர், விபத்தை ஏற்படுத்திய கார் ஓட்டுநரை கைது செய்த காவல் துறையினர், விசாரணை நடத்தி வருகின்றனர். இந்த கோர விபத்தில் படுகாயமடைந்த இளைஞர்கள் தற்போது சேலம் தனியார் மருத்துவமனையில் சிகிச்சைபெற்று வருகின்றனர்.

இதையும் படிங்க: ஆட்டோ மீது டேங்கர் லாரி மோதி ஒருவர் உயிரிழப்பு