'நீட் தேர்வில் விலக்கு; மத்திய அரசை தமிழ்நாடு அரசு வலியுறுத்த வேண்டும்'

சேலம்: நீட் தேர்வில் விலக்கு அளிக்க தமிழ்நாடு அரசு, மத்திய அரசை தொடர்ந்து வலியுறுத்த வேண்டும் என நடிகர் கருணாஸ் கோரிக்கை வைத்துள்ளார்.

தென்னிந்திய நடிகர் சங்கத் தேர்தல் வருகின்ற 23ஆம் தேதி சென்னையில் நடைபெறவுள்ளது. இதையொட்டி மாநிலம் முழுவதும் உள்ள நாடக நடிகர்களை சந்தித்து தற்போதைய நடிகர் சங்க நிர்வாகிகள் வாக்கு சேகரித்துவருகின்றனர். அதன்படி சேலத்தில் உள்ள நாடக நடிகர்களை சந்தித்து நடிகர் கருணாஸ் தலைமையிலான குழுவினர் வாக்குச் சேகரித்தனர். அப்போது நடிகர் கருணாஸ் பேசுகையில், சென்ற தேர்தலின்போது கொடுக்கப்பட்ட வாக்குறுதிகளில் 90 விழுக்காட்டிற்கு மேல் நிறைவேற்றப்பட்டுள்ளன.

அதேபோல் இந்தாண்டும் எங்களது அணி வெற்றிபெற்றால், சேலம் மாவட்டத்தில் உள்ள நலிவடைந்த நாடகக் கலைஞர்களுக்கு இலவச வீட்டு மனை, திண்டுக்கல்லில் உள்ள தனது சொந்த நிலத்தில் ஐந்து ஏக்கர் பரப்பளவில் நலிவடைந்த நாடக நடிகர்கள் இறுதிக் காலத்தை அமைதியாக செலவழிக்க முதியோர் இல்லம் ஆகியவை அமைக்கப்படும் உறுதியளித்தார்.

இதைத் தொடர்ந்து அவர் செய்தியாளர்களிடம் கூறியதாவது, "நடைபெற உள்ள தமிழ்நாடு சட்டப்பேரவை கூட்டத் தொடரில் நீட் தேர்வு உள்ளிட்ட மாநிலம் நலன் சார்ந்த கோரிக்கைகளுக்காக குரல் கொடுப்பேன்.

நீட் தேர்வு தமிழ்நாடு மாணவர்களின் எதிர்காலத்தை கேள்விக்குறியாக்கியுள்ளது. மாணவி அனிதா நீட் தேர்வால் உயிரிழந்தார். அண்மையில் கூட சில மாணவிகள் நீட் தேர்வால் தற்கொலை செய்துகொண்டுள்ளனர். இதுபோன்ற உயிரிழப்புகள் இனி தமிழ்நாட்டில் நடக்கக் கூடாது . அதற்காக நீட் தேர்வில் தமிழ்நாட்டிற்கு மத்திய அரசு விலக்கு அளிக்க வேண்டும் என தமிழ்நாடு அரசு தொடர்ந்து வலியுறுத்த வேண்டும்" என்றார்.