ராணிப்பேட்டை அருகே இளைஞரைக் கொன்று புதைத்த 4 பேர் கைது!

Ranipet Murder: ராணிப்பேட்டை அருகே இளைஞரை கொலை செய்து புதைத்த 4 பேரை காவல் துறையினர் கைது செய்து சிறையில் அடைத்துள்ளனர்.

வேலூர்: ராணிப்பேட்டை மாவட்டம் காவேரிப்பாக்கம் அடுத்த அத்திப்பட்டு கிராமத்தைச் சேர்ந்தவர், இளவரசன்(28). இவர் லாரி ஓட்டுநராக பணியாற்றி வருகிறார். இந்த நிலையில், கடந்த நவம்பர் 6ஆம் தேதி முதல் இளவரசன் காணவில்லை என அவரது பெற்றோர் காவல் நிலையத்தில் புகார் அளித்திருந்தனர்.

இது தொடர்பாக வழக்குப் பதிவு செய்த காவேரிப்பாக்கம் காவல் துறையினர், ராணிப்பேட்டை காவல் கண்காணிப்பாளர் கிரண் சுருதி உத்தரவின் பேரில், மூன்று தனிப்படை அமைத்து விசாரணை மேற்கொண்டனர். இந்த விசாரணையில், சந்தேகத்தின் அடிப்படையில் அத்திப்பட்டு கிராமத்தைச் சேர்ந்த லோகேஷ் என்கிற லாலு (27), பூவரசன்(24), வாசுதேவன் (27) மற்றும் அருண்குமார் (33) ஆகியோரைப் பிடித்து தொடர் விசாரணை மேற்கொண்டனர்.

இந்த விசாரணையில், காணாமல் போன இளவரசன் மற்றும் பிடிபட்டவர்களுக்கும் இடையே கடந்த ஜனவரி மாதம் பொங்கல் பண்டிகை அடுத்து வரும் மைலர் திருவிழாவில் தகராறு ஏற்பட்டதும், அது தொடர்பாக காவேரிப்பாக்கம் காவல் நிலையத்தில் புகார் இருப்பதும் தெரிய வந்துள்ளது.

மேலும், இது தொடர்பாக ஏற்பட்ட முன் விரோதம் காரணமாக கடந்த நவம்பர் 6 அன்று மாலை அத்திப்பட்டு கிராமத்தில் உள்ள அரிச்சந்திரன் சிலை அருகே லோகேஷ், பூவரசன், வாசுதேவன் மற்றும் அருண்குமார் ஆகியோர் மது அருந்தி கொண்டிருந்தபோது, அவ்வழியாக வந்த இளவரசனை வம்பிழுத்து, கையில் வைத்திருந்த கத்தி, பீர் பாட்டிலால் சரமாரியாகத் தாக்கி உள்ளனர்.

இதில் நிலை தடுமாறி கீழே விழுந்த இளவரசனை, இருசக்கர வாகனத்தில் திருப்பாற்கடல் பாலாற்றுக்கு அழைத்து வந்து, அங்கே கொலை செய்து, தங்கள் கைகளால் நான்கு பேரும் பள்ளம் தோண்டி ஆற்றிலேயே புதைத்ததும் தெரிய வந்துள்ளது. இதனையடுத்து,
இவர்கள் நால்வரையும் கைது செய்த காவேரிப்பாக்கம் காவல் துறையினர், கொலை செய்தவர்கள் உதவியுடன் இளவரசன் புதைக்கப்பட்ட இடத்தைக் கண்டறிந்து, வருவாய்த்துறை முன்னிலையில் சடலம் தோண்டி எடுக்கப்பட்டது.

அதனைத் தொடர்ந்து, பிரேத பரிசோதனைக்காக வேலூர் அடுக்கம்பாறை தலைமை மருத்துவமனைக்கு உடல் அனுப்பி வைக்கப்பட்டது. இதனிடையே, கைதானவர்கள் வாலாஜா நீதிமன்றத்தில் ஆஜர்படுத்தப்பட்டு, பின்னர் வேலூர் மத்திய சிறையில் அடைக்கப்பட்டனர்.

மேலும், உயிரிழந்தவர் மற்றும் கொலை செய்தவர்கள் ஆகியோர் ஒரே கிராமத்தைச் சேர்ந்தவர் என்பதால் அத்திப்பட்டு கிராமத்தில் பதட்டமான சூழல் ஏற்பட்டுள்ளது. எனவே, இந்த பதட்டத்தை தணிக்க ராணிப்பேட்டை காவல் கண்காணிப்பாளர் கிரண் சுருதி, கூடுதல் காவல் கண்காணிப்பாளர் விஸ்வேஸ்வரய்யா, துணை கண்காணிப்பாளர் ரவிச்சந்திரன் தலைமையில் நூற்றுக்கும் மேற்பட்ட போலீசார் அப்பகுதியில் குவிக்கப்பட்டுள்ளனர்.

இதையும் படிங்க:கள்ளகாதலுக்கு இடையூறாக இருந்த கணவன் கொலை.. மனைவி, கள்ளகாதலன் உட்பட 4 பேர் கைது!