சாமி தரிசனம் செய்ய சென்றபோது வேன் கவிழ்ந்து 13 பேர் காயம்!

ராமநாதபுரம்: ராமேஸ்வரத்துக்கு சாமி தரிசனம் செய்ய சென்றபோது ஓட்டுநரின் கட்டுப்பாட்டை இழந்த வேன் நிலைதடுமாறி பள்ளத்தில் உருண்டு விழுந்ததில் 13 பேர் காயமடைந்தனர்.

சென்னை எண்ணூர் அருகே உள்ள காசி விஸ்வநாதர் கோயில் குப்பம் பகுதியைச் சேர்ந்த ஆறு குடும்பங்கள் உள்பட 19 பேர் வாடகை வேனில் ராமேஸ்வரத்துக்கு ஆன்மிகச் சுற்றுலா சென்றுள்ளனர்.

முதலில் திருச்செந்தூர் கோயிலுக்குச் சென்று சாமி தரிசனம் செய்துவிட்டு இரவில் ராமேஸ்வரம் நோக்கிப் புறப்பட்டுள்ளனர். அதிகாலையில் மண்டபம் கடற்கரை பூங்கா பகுதியில் வேன் சென்றுகொண்டிருந்தபோது மழை பெய்ததால் வாகனத்தின் வேகத்தை குறைக்க ஓட்டுநர் பிரேக் அடித்ததும் வாகனம் ஓட்டுநரின் கட்டுப்பாட்டை இழந்து நிலைதடுமாறி அருகிலிருந்த சாலை பள்ளத்தில் உருண்டு விழுந்தது.

இதில் வாகனத்திலிருந்த 13 பேர் காயமடைந்தனர். மூவர் படுகாயமடைந்தனர்.

விபத்து குறித்து அருகில் இருந்தவர்கள் காவல் துறையினருக்குத் தகவல் அளித்தனர். இதனைத்தொடர்ந்து ஆம்புலன்ஸ் உதவியுடன் விபத்தில் சிக்கியவர்கள் மீட்கப்பட்டு, ராமநாதபுரம் அரசு மருத்துவமனையில் அனுமதிக்கப்பட்டு சிகிச்சை பெற்றுவருகின்றனர்.

விபத்து குறித்து மண்டபம் காவல் துறையினர் வழக்குப்பதிவு செய்து விசாரணை நடத்திவருகின்றனர்.

இதையும் படிங்க: சர்வதேச திரைப்பட விழாவுக்கு தேர்வான 2 தமிழ் படங்கள்!