இருவேறு கொலை சம்பவங்களில் கொலையாளிகள் கைது!

ராமநாதபுரம்: திருவாடானையில் இருவேறு பகுதிகளில் நடைபெற்ற கொலை சம்பவங்களில் ஈடுபட்ட கொலையாளிகளை காவல்துறையினர் கைது செய்து விசாரணை செய்து வருகின்றனர்.

ராமநாதபுரம் மாவட்டம், திருவாடனை அருகே ஒரியூர் கிராமத்தில் சாத்தையா என்பவருக்கு நாச்சரம்மாள் (70) என்ற மனைவி, இரு பெண் மற்றும் முனீஸ்வரன் என்ற மகனும் உள்ளனர்.

முனீஸ்வரன் தனது தயார் நாச்சரம்மாளிடம் சொத்துக்களைப் பிரித்து தர தொடர்ந்து வற்புறுத்தி வந்ததாகத் தெரிகிறது. மேலும் தனது சகோதரிகளுக்கே சொத்துக்களை விற்று கொடுத்ததாக கோபத்திலிருந்த அவர் தனது தாயாரிடம் நேற்று முன்தினம் (பிப்ரவரி 10ஆம் தேதி) காலை தகராறு செய்து, வீட்டின் வெளியே இருந்த பனைமர கட்டையினால் தலையில் அடித்ததில் சம்பவ இடத்திலேயே நாச்சரம்மாள் உயிரிழந்தார்.

நாச்சரம்மாள்

தகவலறிந்து சம்பவ இடத்திற்கு வந்த காவல்துறையினர் நாச்சரம்மாளின் உடலை கைப்பற்றி உடற்கூறாய்விற்காக அரசு மருத்துவமனைக்கு அனுப்பிவைத்தனர். தொடர்ந்து வழக்குப்பதிவு செய்து முனீஸ்வரனை கைது செய்தனர்.

அதேபோல் ஆர்.எஸ்.மங்கலம் அருகே உள்ள ஏந்தக்கரை பகுதியைச் சேர்ந்தவர் கருப்பையா(50). விவசாயியான இவர் தனது வீட்டிற்கு அருகில் உள்ள காலியிடத்தில் வைக்கோல் வைப்பதற்காக, இடத்தை சுத்தம் செய்து தீ வைத்து எரித்ததாக கூறப்படுகிறது

இதனால் அருகில் இருந்த சண்முகம் என்பவருக்குச் சொந்தமான வைக்கோல் படப்பில் தீ பற்றியது இதில் ஆத்திரமடைந்த சண்முகம் அவரின் தந்தை கருப்பையா, தாய் வள்ளி ஆகிய மூவரும் கருப்பையாவிடம் வாய்த்தகராறில் ஈடுபட்டுள்ளனர். தகராறு முற்றி சண்முகம் கருப்பையாவை தாக்கியுள்ளார்.இதில் நிலைதடுமாறி கீழே விழுந்த கருப்பையா உயிரிழந்தார். தகவல் அறிந்து வந்த ஆர்.எஸ்.மங்கலம் காவல்துறையினர் மூவரையும் கைது செய்து விசாரணை செய்து வருகின்றனர்.

இதையும் படிங்க:சொத்துத் தகராறில் மகனை வெட்டிப் படுகொலை செய்த தந்தை