‘உப்பூர் அனல் மின் நிலைய பாலத்துக்கு எதிர்ப்பு தெரிவித்து போராட்டம்’

ராமநாதபுரம்: உப்பூர் அனல் மின் நிலையத்திற்காக கழிவு மண்ணை பயன்படுத்தி கடலுக்குள் பாலம் அமைப்பதை கண்டித்து மோர்பண்ணை கிராம மக்கள், மாணவர்கள் சாலை மறியலில் ஈடுபட்டனர்.

ராமநாதபுரம் மாவட்டம் திருவாடனைக்குட்பட்ட உப்பூரில், சூப்பர் கிரிட்டிக்கல் தொழில்நுட்பத்தில் 800 மெகாவாட் திறன் கொண்ட இரண்டு அனல் மின் நிலையங்கள், அதாவது 1600 மெகாவாட் உற்பத்தியில் அமையவுள்ளது. இதற்காக 912 ஏக்கர் நிலத்தை கையகப்படுத்தி, கோடிக்கணக்கான ரூபாய் செலவில் பணிகள் நடைபெற்று வருகின்றன. தற்பொழுது கடலினுள் 8 கிலோ மீட்டருக்கு மண்ணைக் கொட்டி பாலம் அமைக்கும் பணி நடைபெறுகிறது.

இந்தப் பாலம் அமைக்கும் பணிக்கு உயர் நீதிமன்றத்தால் தடை செய்யப்பட்ட சவுடு மணல் பயன்படுத்தப்படுவதாகவும், கழிவு மண்ணை கடலில் கொட்டி பாலம் அமைக்கப்பட்டுவதால் 20 கிராம மீனவர்களின் வாழ்வாதாரம் கேள்விக்குறியாக மாறும், இதில் பிடிக்கப்படும் மீனை மக்கள் வாங்க மறுத்துவிடுவார்கள் என்றும் அப்பகுதி மக்கள் கூறிவந்தனர். இதன்மூலம் கடல் வளம் மாசடைவதோடு, அரியவகை உயிரினம் அழியும், இதை தடுக்க நடவடிக்கைகள் எடுக்க வேண்டும் என்று நேற்று மாவட்ட ஆட்சியரிடம் மீனவர்கள் மனு அளித்தனர்.

இந்நிலையில், இன்று காலை மோர் பண்ணை கிராம பெண்கள், பள்ளி மாணவர்கள் என 500-க்கும் மேற்பட்டோர், பாலத்தில் கொட்டுவதற்காக லாரிகளில் மணல் ஏற்றப்படும் இடத்தை முற்றுகையிட்டு 3 மணி நேரத்திற்கு மேலாக போராட்டம் நடத்தினர். இதனால் ராமநாதபுரம் - திருச்சி செல்லும் தேசிய நெடுஞ்சாலையில் போக்குவரத்து மாற்றம் செய்யப்பட்டது. போராட்டத்தில் பங்கேற்ற வயதான பெண் மயக்கமடைந்தது ஆம்புலன்ஸ் மூலமாக மருத்துவமனைக்கு அழைத்துச் செல்லப்பட்டார். இதனால் அங்கு சற்று நேரம் பரபரப்பு நிலவியது.

இதுதொடர்பாக மாவட்ட நிர்வாகம் தலையிட்டு உரிய நடவடிக்கை எடுத்து தீர்வு காண வேண்டும் என்றும் வலியுறுத்திய மக்கள், துணை காவல்துறை கண்காணிப்பாளர் நடத்திய பேச்சுவார்த்தைக்கு பிறகு கலைந்து சென்றனர்.