திரையரங்குகளை திறக்க உரிமையாளர்கள் தயக்கம்

ராமநாதபுரம்: சினிமா தியேட்டர்களை திறக்க தமிழ்நாடு அரசு அனுமதி அளித்தும் ராமநாதபுரம் மாவட்டத்தில் திரையரங்குகளை திறக்க உரிமையாளர்கள் தயக்கம் காட்டியுள்ளனர்.

கரோனா தொற்று தடுப்பு நடவடிக்கையாக கடந்த மார்ச் மாதம் முதல் திரையரங்குகள் மூடப்பட்டன. நவம்பர் 10ஆம் தேதி முதல் தமிழ்நாட்டில் திரையரங்குகளை திறக்க அரசு அனுமதித்துள்ளது. 50 விழுக்காடு பார்வையாளர்கள் அனுமதித்தல் உள்ளிட்ட பல்வேறு விதிமுறைகளைக் கடைப்பிடித்து திரையரங்குகளைத் திறப்பதற்கு அரசு அனுமதி அளித்துள்ளது.

இதனையடுத்து திரையரங்கத்தின் ஊழியர்கள் திரையரங்குகளைத் தயார்படுத்தும் பணியில் ஈடுபட்டனர். இதற்கிடையில் விபிஎஃப் கட்டணத்தை தயாரிப்பாளர்கள் கட்ட முடியாது எனத் தயாரிப்பாளர்கள் சங்கம் தெரிவித்ததால் தீபாவளிக்கு புதிய திரைப்படங்கள் வெளியாவதில் சிக்கல் ஏற்பட்டது.

இதனால் இன்று (நவம்பர் 10) ராமநாதபுரம் மாவட்டத்தில் திரையரங்குகள் எதுவும் திறக்கப்படவில்லை இதுகுறித்து திரையரங்கு உரிமையாளர்கள் கூறுகையில், இந்த ஆண்டு தீபாவளிக்கு புதிய திரைப்படங்கள் எதுவும் ரிலீஸ் ஆகவில்லை. மேலும் பழைய படங்களை திரையிட்டால் ரசிகர்கள் தியேட்டருக்கு வருவதில் சந்தேகமாக உள்ளது.

இந்த நிலையில் திரையரங்குகளை திறப்பது குறித்து நாங்கள் எந்த முடிவும் எடுக்கவில்லை என்று தெரிவித்தனர். இதனால் ராமநாதபுர மாவட்டத்தில் திரையரங்குகள் திறக்கப்படவில்லை.