ராமநாதபுரம் கடற்கரை பகுதியில் இறந்த நிலையில் கரை ஒதுங்கிய ராட்சத நீலத் திமிங்கலம்!

ராமநாதபுரம்: வாலிநோக்கம் கடற்கரை பகுதியில் இறந்த நிலையில் ஏழு டன் எடை கொண்ட ராட்சத நீலத் திமிங்கலம் கரை ஒதுங்கியது.

ராமநாதபுரம் மாவட்டம் வாலிநோக்கம் கடற்கரை பகுதியில் ஏழு டன் எடை கொண்ட ராட்சத நீலத் திமிங்கலம் இறந்த நிலையில் கரை ஒதுங்கி இருப்பதாக மீனவர்கள் வனத்துறையினருக்கு தகவல் தெரிவித்தனர். இதனையடுத்து கீழக்கரை வனச்சரகர் சிக்கந்தர் பாட்சா தலைமையிலான வனத்துறை அலுவலர்கள், வேட்டை தடுப்புப் காவலர்கள், கால்நடை மருத்துவர் பகவத்சிங் ஆகியோர் கடற்கரை பகுதிக்கு வந்தனர்.

பின்னர் இரண்டு பொக்லைன் இயந்திரங்கள் கொண்டு நீலத் திமிங்கலம் இழுத்து வரப்பட்டு, கடற்கரை பகுதியில் வைத்து உடற்கூறாய்வு செய்து புதைக்கப்பட்டது.

இதுகுறித்து கீழக்கரை வனச்சரகர் சிக்கந்தர் பாட்சா கூறுகையில், “ இது நீலத் திமிங்கல வகையைச் சார்ந்தது. சுமார் ஏழு டன் வரை எடையும், 20.20 மீட்டர் நீளமும் உடையது. இந்த திமிங்கலம் படகில் மோதி இறந்திருக்க வாய்ப்பு உள்ளது. இந்த நீலத் திமிங்கலம் ஒரு மாதத்துக்கு முன்பு இறந்திருக்கும். காற்றின் காரணமாக கீழக்கரை பகுதியில் கரை ஒதுங்கிய முதல் திமிங்கலம்” என்றார்.

இதையும் படிங்க:தென்காசியில் பறவைகள் சரணாலயம்: இடம் தேர்வு செய்யும் பணி தீவிரம்!