ராமநாதபுரத்தில் நல்ல மழைப்பொழிவு: அதிகளவில் வந்த 'புள்ளினங்காள்'!

ராமநாதபுரம்: கடந்த 2019ஆம் ஆண்டில் நல்ல மழைப்பொழிவு இருந்ததையொட்டி மாவட்டத்தில் உள்ள ஐந்து பறவைகள் சரணாலயங்களுக்கு வெளிநாட்டுப் பறவைகள், அதிகளவில் வந்துள்ளதாகவும் இந்த ஆண்டு வந்த பறவைகளின் எண்ணிக்கை 30% விழுக்காடு உயர்ந்துள்ளதாக வனத்துறையினர் தெரிவித்தனர்.

ராமநாதபுரம் மாவட்டத்தில் சித்திரங்குடி, காஞ்சிரங்குடி, சக்கரக்கோட்டை, தேர்தங்கல், மேல செல்வனூர்-கீழ செல்வனூர் என ஐந்து பறவைகள் சரணாலயங்கள் உள்ளன. இங்கு ஆண்டுதோறும் டிசம்பர் முதல் பிப்ரவரி மாதம் இறுதி வரை ஆசிய, ஐரோப்பிய நாடுகளைச் சேர்ந்த பறவைகள் வந்து, கூடு கட்டி, முட்டையிட்டு, குஞ்சு பொரிப்பது வழக்கமாகக் காணப்படுகிறது.

கடந்த இரண்டு ஆண்டுகளாகப் போதிய மழைப்பொழிவு இல்லாமல், சரணாலயங்களில் நீர் இல்லாததால் பறவைகள் வரத்து வெகுவாகக் குறைந்து காணப்பட்டது. இதை கருத்தில்கொண்டு மூன்று லட்சம் ரூபாய் மதிப்பில் தேர்தங்கல், மேல செல்வனூர்- கீழச் செல்வனூர் பறவைகள் சரணாலயங்களை வனத்துறையினர் சீரமைத்தனர்.

கடந்த 2019ஆம் ஆண்டு நல்ல மழைப்பொழிவு இருந்ததன் காரணமாக தேர்தங்கல், மேல செல்வனூர் பறவைகள் சரணாலயங்கள் நீர் நிறைந்து காணப்பட்டன. இதனால் ஆசியா, ஐரோப்பியாவிலிருந்து இங்குள்ள சரணாலயங்களுக்கு புள்ளி அழகு குலைகிடா, கரண்டி வாயன், நத்தை கொத்தி, நாரை, அரிவாள் மூக்கன் உள்ளிட்ட வெளிநாட்டுப் பறவைகள் அதிக அளவில் வந்துள்ளன.

இப்பறவைகளின் உணவுத் தேவையை பூர்த்தி செய்வதற்காக வனத்துறையினர் மீன்குஞ்சுகளை மதுரையிலிருந்து வாங்கி வந்து, இந்த சரணாலயங்களில் விட்டுள்ளனர்.

இந்த ஆண்டு பறவைகள் சரணாலயத்திற்கு வந்துள்ள பறவைகளின் எண்ணிக்கை 30% உயர்ந்துள்ளதாக வனத்துறையினர் தெரிவித்தனர். அதற்கான கணக்கெடுப்பு 28, 29ஆம் தேதிகளில் நடைபெறவுள்ளதாகவும் வனத்துறையினர் குறிப்பிட்டனர்.

இதையடுத்து தேர்தங்கல் கிராமத்தில் வசிக்கும் மக்கள் பறவைகளை மிகுந்த நேசத்துடன் பார்த்துச் செல்வதாகவும், பறவைகளை தொந்தரவு செய்யாமல் நடந்துகொள்வதாகவும் கூறிய வனத்துறையினர், 'சரணாலயங்களுக்கு வரும் சுற்றுலாப் பயணிகள் வெளிநாட்டுப் பறவைகளை கண்டு ரசிப்பதுடன், என்னென்ன பறவைகள் வந்துள்ளன என்பதையும் விரும்பிப் பார்த்து மகிழ்ச்சியுடன் செல்கின்றனர்' என்றும் கூறினர்.

இதையும் படிங்க: 'வாருங்கள் பறவைகளை ஆவணப்படுத்துவோம்' - மதுரை பறவை ஆர்வலர்களின் முயற்சி