கடத்தலும் குதிரை பேரமும்! பல்வேறு இடங்களில் அதிமுக-திமுகவினரிடையே மோதல்

ராமநாதபுரம்: உள்ளாட்சித் தேர்தலில் வெற்றிபெற்றவர்களைக் கடத்துவதிலும் அவர்களிடம் குதிரைபேரம் பேசுவதிலும் அதிமுக, திமுகவினரிடையே தமிழ்நாடு முழுவதும் ஆங்காங்கே மோதல் சம்பவங்கள் நிகழ்ந்துவருகின்றன.

அதிமுகவுக்கு தாவிய திமுக கவுன்சிலர்

ராமநாதபுரம் மாவட்டம் பரமக்குடி ஊராட்சி ஒன்றியத்தில் உள்ள 13 இடங்களில் அதிமுக 6, திமுக 7 இடங்களில் வெற்றிபெற்றன. இந்த ஒன்றியத்தில் ஊராட்சிக்குழுத் தலைவர் பதவி பெண்களுக்கு (பொது) ஒதுக்கப்பட்டுள்ளது. ஊராட்சிக்குழுத் தலைவர் பதவிக்கு திமுகவிற்கு போதிய இடங்கள் இருந்தும் ஊராட்சிக்குழுத் தலைவர் பதவியைப் பிடிக்க அதிமுக, திமுகவினரிடையே கடும் போட்டி நிலவுகிறது.

இந்நிலையில் அதிமுகவினர் 11ஆவது வார்டில் வெற்றிபெற்ற திமுக உறுப்பினர் அ. சிவக்குமாரிடம் பேசி தங்களோடு சேர்த்துக்கொண்டனர். இவர்கள் பதவியேற்ற பின்னர் வெளியே வந்த சிவக்குமாரை அதிமுகவினர் வரவேற்றுள்ளனர். இதன்படி, அதிமுகவின் பலம் 7 ஆகவும், திமுகவின் பலம் 6 ஆகவும் ஆனது.

இதனால் கோபமடைந்த திமுகவினர் அதிமுகவினருடன் மோதலில் ஈடுபட்டனர். உடனடியாகக் காவல் துறையினர் இருதரப்பினரையும் சமரசம்செய்து சிவலிங்கத்தை பத்திரமாக வீட்டிற்கு அழைத்துச் சென்றனர்.

சுயேச்சைகளை கடத்துவதில் மும்முரம்

இதேபோல், முதுகுளத்தூர் ஒன்றியத்தில் 8ஆவது வார்டு ஒன்றிய உறுப்பினராகத் தேர்வாகியுள்ள சுயேச்சை வேட்பாளரை அதிமுக ஒன்றியச் செயலாளர் ஆர். தர்மர் உள்ளிட்ட சிலர் கடத்திச் சென்றதாக அவரது மகன் ராஜா முதுகுளத்தூர் காவல் நிலையத்தில் புகார் அளித்ததை அடுத்து காவல் துறையினர் விசாரணை நடத்திவருகின்றனர்.

தூத்துக்குடி மாவட்டம் கோவில்பட்டி ஊராட்சி ஒன்றியத்தில் புதிதாகப் பதவியேற்ற சுயேச்சை ஒன்றிய கவுன்சிலர்களை திமுகவினர் வேனில் கடத்திச் சென்றனர். இதனால் அதிமுக-திமுக தொண்டர்களுக்கிடையே மோதல் ஏற்பட்டது. இதனையடுத்து அதிமுகவினர் சாலையில் அமர்ந்து போராட்டத்தில் ஈடுபட்டனர். தொடர்ந்து காவல் துறையினர் இருதரப்பினரிடையே பேசி அமைதிப்படுத்தினர்.

அமமுகவுக்கு போட்டிபோட்ட திமுக-அதிமுக

மதுரை மாவட்டம் உசிலம்பட்டி ஊராட்சி ஒன்றியத்தில் உள்ள 13 ஒன்றிய கவுன்சிலர் பதவிக்கு திமுக கூட்டணி ஐந்து இடங்கள், அதிமுக ஐந்து இடங்கள், அமமுக இரண்டு இடங்கள், சுயேச்சை ஒரு இடத்திலும் வென்றுள்ளனர்.

இவர்கள் பதவியேற்ற பின்னர் வெளியே வந்த அமமுகவைச் சேர்ந்த அலெக்ஸ்பாண்டி, மலேசியா பாண்டி என்ற இரு ஒன்றிய கவுன்சிலர்களை அதிமுக, திமுகவினர் கடத்த முயன்றனர். அப்போது பாதுகாப்புப் பணியிலிருந்த காவல் துறையினர் கடத்த முயன்றவர்கள் மீது லேசான தடியடி நடத்தி கலையச் செய்தனர்.

இதையும் படிங்க: உள்ளாட்சித் தேர்தலில் கிடைத்த வெற்றி ஸ்டாலினுக்கான பரிசு - முன்னாள் அமைச்சர் பெருமிதம்!