புதுக்கோட்டை மாவட்டத்தில் பிரசித்தி பெற்ற திருவப்பூர் ஸ்ரீ முத்துமாரியம்மன் கோயில் தேர் திருவிழா இன்று (பிப். 26) பூச்சொரிதலுடன் தொடங்கியது. இந்த பூச்சொரிதல் விழாவை முன்னிட்டு பாரம்பரிய ஜல்லிக்கட்டு போட்டி திருவப்பூர் அருகே உள்ள கவிநாடு கண்மாயில் நடைபெற்றது. இந்நிலையில் வாடிவாசலிருந்து அவிழ்த்து விடப்பட்ட காளைகள் நாலாபுறமும் சிதறி ஓடியன. இதில் ஜல்லிக்கட்டு திடலின் ஒரு பகுதியில் உள்ள கண்மாய் நீருக்குள் பத்துக்கு மேற்பட்ட காளைகள் ஓடின.
இதையடுத்து ஜல்லிக்கட்டு காளையைத் தேடி காளையின் உரிமையாளர்கள் இருவர் கண்மாய்க்குள் இறங்கினர். இந்நிலையில் கண்மாய்க்குள் இறங்கிய காளை ஒன்று கழுத்தில் கட்டி இருந்த கயிறு மறுமுனை கண்மாயில் உள்ள கருவேல மரத்தில் சிக்கி சகதிக்குள் புதைந்தது. இதையடுத்து சகதிக்குள் மூழ்கிய காளையை மீட்க காளையின் உரிமையாளர்கள் சென்ற நிலையில் காளை வெளியே வர முடியாமல் உயிரிழந்தது.