சம்மன் வழங்க சென்ற காவலர் மீது தாக்குதல்

புதுக்கோட்டை: அறந்தாங்கியில் சம்மன் வழங்க சென்ற காவலரை தாக்கிய நபரை காவல் துறையினர் தேடி வருகின்றனர்.

புதுக்கோட்டை மாவட்டம் அறந்தாங்கி அக்கினி பஜாரை சேர்ந்த சரவணன் என்பவருக்கு, சாலை விபத்து தொடர்பாக சம்மன் வழங்க காவலர் ராமராஜன் என்பவர் சென்றுள்ளார்.

அப்போது காவலர் ராமராஜனை கடைவீதியில் காத்திருக்கும்படி சரவணன் கூறியுள்ளார். பின்னர் அங்கு சென்ற சரவணனின் நண்பர் துரைராஜ் என்பவர், வீட்டிற்கு வரக் கூடாது எனக்கூறி காவலரிடம் வாக்குவாதத்தில் ஈடுபட்டதாக தெரிகிறது.

பின்னர் காவலரை தாக்கிய துரைராஜ், அங்கிருந்து தப்பிச்சென்றார். காயமடைந்த காவலர் ராமராஜன் அறந்தாங்கி காவல் நிலையத்தில் புகார் அளித்தார்.

இதுதொடர்பாக காவல் துறையினர் வழக்குப்பதிவு செய்து துரைராஜை தேடி வருகின்றனர்.

இதையும் படிங்க:திருப்பத்தூரில் காவலரைத் தாக்கிய போதை ஆசாமிகள்!