சூடுபிடிக்கும் தேர்தல் களம்: ஜல்லிக்கட்டு காளையுடன் நாம் தமிழர் வேட்பாளர் பரப்புரை!

புதுக்கோட்டை: சட்டப்பேரவைத் தொகுதியில் நாம் தமிழர் வேட்பாளராக அறிவிக்கப்பட்ட சசிகுமார், ஜல்லிக்கட்டு காளைகள் புடை சூழ தனது பரப்புரையை தொடங்கியுள்ளார்.

தமிழ்நாட்டில் சட்டப்பேரவை தேர்தல் இன்னும் மூன்று மாத காலத்தில் நடக்க உள்ளது. தற்போது அரசியல் கட்சிகள் தேர்தல் பணிகளை தொடங்கிவிட்டனர்.

இந்நிலையில், தேர்தலில் 234 தொகுதிகளிலும் தனித்து களம் காண உள்ள நாம் தமிழர் கட்சி, கடந்த வாரம் புதுக்கோட்டை, தஞ்சை உள்ளிட்ட டெல்டா மாவட்டங்களில் போட்டியிடும் வேட்பாளர் பட்டியலை அறிவித்தது. அதன்படி, புதுக்கோட்டை சட்டப்பேரவைத் தொகுதியில் நாம் தமிழர் கட்சி வேட்பாளராக சசிகுமார் களமிறங்க உள்ளார்.

திமுக, அதிமுக கட்சிகள் வேட்பாளர்களை அறிவிக்காமலேயே தேர்தல் சுற்றுப்பயணத்தில் ஈடுபட்டு வருகின்றனர். அவர்களுக்கு நாங்களும் சளைத்தவர்கள் இல்லை என்பதை காட்டும் வகையில், நாம் தமிழர் கட்சி வேட்பாளரான சசிகுமார், தமிழர்களின் வீர கலையான சிலம்பாட்டம், தப்பாட்டம் ஆகியவற்றுடன் ஜல்லிக்கட்டு காளைகள் புடை சூழ தனது பரப்புரையை தொடங்கினார்.