புதுக்கோட்டை மாவட்டம் அறந்தாங்கி அழியாநிலை பகுதியில் அரசு நுகர்பொருள் வாணிப கழகத்தின் கிடங்கு உள்ளது. இங்கு அறந்தாங்கி, ஆவுடையார் கோவில், மணமேல்குடி உள்ளிட்ட 16 நிலையங்களில் இருந்து அரசால் கொள்முதல் செய்யப்படும் நெல் மூட்டைகள் அடுக்கி வைக்கபடுகிறது. தற்போது இந்த கிடங்கில் நெல் மூட்டைகளை வைக்க இடம் இல்லை என்று அலுவலர்கள் கூறியதால் லாரி ஓட்டுநர்கள் சாலை மறியல் போராட்டத்தில் ஈடுபட்டனர்.
இதுகுறித்து லாரி உரிமையாளர் சங்கத் தலைவர் அடைக்கலம் கூறுகையில், "கடந்த சில மாதமாக அறந்தாங்கி சுற்றுவட்டார ஒன்றிய பகுதிகளில் இருந்து அரசு கொள்முதல் செய்யும் நெல் மூட்டைகளை ஏற்றி வருகிறோம். அதற்கான வாடகை சரியான முறையில் வழங்கப்படவில்லை. நெல் மூட்டைகளை இறக்குவதிலும் அலுவலர்கள் மிகுந்த தாமதம் செய்கின்றனர். இதுகுறித்து உயர் அலுவலர்களிடம் கேட்டாலும் முறையான பதில் கூறுவதில்லை" என்றனர்.