'கர்நாடகாவில் மழை பெய்வதே எடப்பாடி ராசியால் தான்' - திகில் கிளப்பிய அமைச்சர் விஜயபாஸ்கர் !

புதுக்கோட்டை : முதலமைச்சர் எடப்பாடி பழனிசாமியின் ராசியால் தான் கர்நாடகாவில் மழைப் பெய்து, காவிரியில் நீர் கரைபுரண்டு ஓடுவதாக சுகாதாரத் துறை அமைச்சர் விஜயபாஸ்கர் தெரிவித்துள்ளார்.

புதுக்கோட்டை மாவட்டம் அறந்தாங்கி அருகே மணல்மேல்குடியில் அறிஞர் அண்ணாவின் 111ஆவது பிறந்த நாள் விழா பொதுக்கூட்டம் நடைபெற்றது. இந்த பொதுக்கூட்டத்தில் கலந்துகொண்டு பேசிய சுகாதாரத் துறை அமைச்சர் விஜயபாஸ்கர் கூறியதாவது,

"தமிழ்நாடு முதலமைச்சர் எடப்பாடி கே.பழனிசாமி ராசியால்தான் கர்நாடகாவில் மழை பெய்கிறது. காவிரியில் தண்ணீர் புரண்டு வருகிறது. மேட்டூர் திறந்த சில நாட்களிலேயே கடைமடை வரை தண்ணீர் வந்து சேர்ந்தது. ஆனால், மறைந்த முன்னாள் முதலமைச்சர் கருணாநிதியின் ஆட்சியில் மழையே வராது என்பது யாவரும் அறிந்ததே" என கூறினார்.

தொடர்ந்து பேசிய அவர், அரசியல் பயணம் என்பது ஆர்ப்பரித்து எழும் அலையில் செலுத்தும் கப்பலை போன்றது என்றும், கடலில் செல்லும்போது சூறாவளியடித்தலோ, திமிங்கலம் வந்தாலோ கப்பல் லேசாக ஆடும். ஆனால், அதிமுக எனும் கப்பல் புயலே வந்தாலும் கவிழாது எனவும் தெரிவித்தார்.

கப்பல் லேசாக ஆடுகிறதே என எண்ணி கப்பலில் இருந்து குதித்தவர்களின் நிலை என்ன ஆயிற்று? அவர்கள் கரை ஏறியதாக வரலாறு இல்லை என அதிமுகவில் இருந்து பிரிந்து சென்ற டிடிவி தினகரனின் அமமுக குறித்து அமைச்சர் மறைமுகமாக சாடினார்.

இதையும் பார்க்க: "டெங்கு பரவாமல் தடுக்க சர்வதேச அளவில் நடவடிக்கைகள்"- அமைச்சர் விஜயபாஸ்கர் உறுதி!