"பல்லுயிர் இருப்பிடமாக" மாறிய பனங்கூர் கிராம குளங்கள்!

பெரம்பலூர்: பனங்கூர் கிராம மக்கள் ஒன்றிணைந்து பராமரிப்பின்றி இருந்த குளங்களைத் தூர்வாரி, "பல்லுயிர் இருப்பிடமாக" மாற்றி மற்ற கிராமத்தினருக்கும் முன்னுதாரணமாய் திகழ்கின்றனர்.

பெரம்பலூர் அருகே உள்ள பனங்கூர் கிராமத்தில் பெரியகுளம், புறக்குட்டை, அய்யனார் குளம் ஆகிய மூன்று நீர் நிலைகள் உள்ளன. இந்த கிராம மக்களின் குடிநீர் தேவையைப் பூர்த்தி செய்த இந்த நீர் நிலைகள், முறையான பராமரிப்பு இல்லாமலும், தூர் வாரப்படாததாலும் கருவேலமரங்கள் சூழ்ந்து முட்காடாக மாறியது. இதனால் குடிநீருக்கு சிரமப்பட்ட கிராம மக்கள், அதை உணர்ந்து இந்தக் குளங்களை மீட்டெடுக்கும் முயற்சியில் இறங்கினர்.

இதற்காக வீடு தோறும் குறிப்பிட்ட தொகையை வசூலித்து மொத்தம் ரூ.2.60 லட்சம் நிதி திரட்டிய அக்கிராமத்தினர் கடந்த 2 மாதத்திற்கு முன்பு குளங்களை தூர் வாரி, சீரமைத்தனர். மேலும் ஒரு குளத்திலிருந்து மற்றொரு குளத்திற்கு தண்ணீர் செல்வதற்கு இணைப்புப் பாலம் அமைத்தனர்.

இதனிடையே சமீபத்தில் பெய்த மழையால் குளம் நிரம்பியது. இந்நிலையில் ரூ.50 ஆயிரம் மதிப்பில் குளங்களைச் சுற்றி பாதுகாப்பிற்காக வேலி அமைக்கும் பணியும் குளங்களைச் சுற்றி மரம் நடும் பணியும் நடைபெற்றது. தற்போது அந்த மரங்களுக்குத் தண்ணீர் பாய்ச்சுவதற்காக ரூ.10 ஆயிரம் செலவில் குழாய்கள் அமைக்கும் பணியும் நடைபெற்று வருகிறது. பனங்கூர் கிராம மக்கள் மொத்தம் ரூ.3 லட்சத்து 50 ஆயிரம் மதிப்பில் குளங்களை செப்பனிட்டு வேலி அமைத்து, "பல்லுயிர் இருப்பிடமாக" மாற்றி மற்ற கிராமத்தினருக்கும் முன்னுதாரணமாய் திகழ்கின்றனர்.

இதையும் படியுங்க:

முழு வேகத்தில் தூர்வாரப்படும் சிறு பாசன குளங்கள்!