பெற்றோரை கொலை செய்த மகன் கைது!

பெரம்பலூர்: லாடபுரம் அருகே தாய், தந்தை ஆகியோரை கழுத்தை அறுத்து கொலை செய்த மனநலம் பாதிக்கப்பட்ட மகனை காவல் துறையினர் கைது செய்தனர்.

பெரம்பலூர் மாவட்டம் லாடபுரம் அருகே உள்ள தேவேந்திரகுல தெருவில் வசித்தவர்கள் ராமசாமி-செல்லம்மாள் தம்பதியினர். இவர்களுக்கு மனநலம் பாதிக்கப்பட்ட ரமேஷ் என்ற ஒரு மகன் உள்ளார். மேலும் மனநலம் பாதிக்கப்பட்டதால் ரமேஷின் மனைவி தங்கமணி தனது குழந்தைகளோடு தனியாக வசித்துவருகிறார்.

ஒவ்வொரு நாளும் மாமனார், மாமியாரை பார்த்து விட்டுச் செல்வது தங்கமணிக்கு வழக்கம். இந்நிலையில், அவர் இன்று காலை வீட்டிற்கு வந்து பார்த்தபோது மாமனாரும், மாமியாரும் கழுத்தறுக்கப்பட்ட நிலையில் இறந்து கிடந்ததைக் கண்டு அதிர்ச்சியடைந்தார்.

இது குறித்து தகவலறிந்து சம்பவ இடத்திற்கு வந்த காவல் துறையினர், இறந்தவர்களின் உடலை மீட்டு உடற்கூறாய்வுக்காக பெரம்பலூர் அரசு மருத்துவமனைக்கு அனுப்பிவைத்தனர்.

மேலும், இந்தத் கொலையை செய்தது மனநலம் பாதிக்கப்பட்ட ரமேஷ் என்பதை உறுதி செய்த காவல் துறையினர் அவரை கைது செய்தனர்.

இதையும் படிங்க: பெற்றோரை அம்மிக்கல்லைப் போட்டு கொலைசெய்த மகன் கைது!