வெளிநாட்டில் வேலைவாங்கித் தருவதாக ஏமாற்றிய கும்பல்: பாதிக்கப்பட்டவர்கள் புகார் மனு!

பெரம்பலூர்: வெளிநாட்டில் வேலை வாங்கித் தருவதாக, பண மோசடி செய்த நபர்கள் மீது நடவடிக்கை எடுக்கக்கோரி, பாதிக்கப்பட்டவர்கள் மாவட்ட ஆட்சியர் அலுவலகத்தை முற்றுகையிட்டனர்.

பெரம்பலூர் மாவட்டம், வேப்பந்தட்டை வட்டம், மேட்டுப்பாளையம் கிராமத்தைச் சேர்ந்த பொதுமக்கள், தங்களிடம் வெளிநாட்டில் வேலை வாங்கித் தருவதாகக் கூறி, மோசடி செய்தவர்கள் மீது நடவடிக்கை எடுக்கக்கோரி முற்றுகையிட்டனர்.

பெரம்பலூர் அருகே உள்ள மேட்டுப்பாளையம் கிராமத்தைச் சேர்ந்த லட்சுமணன், தவமணி, கலையரசன் ஆகிய மூன்று பேர் சேர்ந்து; அதே ஊரைச் சேர்ந்த இளங்கோவன், செல்வராஜ் உள்ளிட்ட 15க்கும் மேற்பட்டவரிடம் வெளிநாட்டில் வேலை வாங்கித் தருவதாகக் கூறி, ரூ.25 லட்சம் பணம் பெற்றுக்கொண்டு, கடந்த 3 ஆண்டுகளாக வேலை பெற்றுத்தரவில்லை எனக் கூறப்படுகிறது.

இதனால் பாதிக்கப்பட்டவர்கள் பண மோசடி செய்தவர்கள் மீது நடவடிக்கை எடுக்க வேண்டும் என பெரம்பலூர் மாவட்ட ஆட்சியர் அலுவலகத்தை முற்றுகையிட்டனர். இதைத் தொடர்ந்து மாவட்ட ஆட்சியர் அலுவலகத்தில் அவர்கள் மனு அளித்தனர்.