'எஸ்.ஆர்.எம். பல்கலைக்கழகத்தில் 300 மாணவர்களுக்கு இலவச கல்வி'

பெரம்பலூர்: எஸ்.ஆர்.எம். பல்கலைக்கழகத்தில் இந்த ஆண்டும் 300 மாணவர்களுக்கு இலவசமாக உயர் கல்வி அளிக்கப்படும் என பெரம்பலூர் நாடாளுமன்ற உறுப்பினர் பாரிவேந்தர் அறிவித்துள்ளார்.

2019ஆம் ஆண்டு நடைபெற்ற மக்களவை தேர்தலின் போது, பெரம்பலூர் தொகுதியில் உள்ள 300 மாணவர்களுக்கு ஆண்டுதோறும் தகுதியின் அடிப்படையில் இலவச உயர் கல்வி வழங்குவதாக அந்த தொகுதியின் நாடாளுமன்ற உறுப்பினர் மருத்துவர் பாரிவேந்தர் வாக்குறுதி அளித்தார்.

அதன்படி, 2019-20ஆம் ஆண்டுக்கான முதல் பிரிவில் (batch) மாணவர்கள் சேர்க்கப்பட்டு படித்து வருகின்றனர். இதனிடையே, இந்த ஆண்டும் (2020-21 ஆண்டு) பெரம்பலூர் நாடாளுமன்ற தொகுதியில் உள்ள 300 மாணவர்களுக்கு எஸ்.ஆர்.எம். பல்கலைக்கழகத்தில் இலவச உயர் கல்வி வழங்கப்படும் என பாரிவேந்தர் அறிவித்துள்ளார்.

இதற்கு ஆர்வமும் தகுதியும் உள்ள மாணவர்கள் பட்டப் படிப்பிற்கு விண்ணப்பித்து பயன் பெற www.ijkparty.org/www.srmist.edu.in என்ற வலைதளத்தில் ஆன்லைன் மூலம் செப்டம்பர் 10ஆம் தேதிக்குள் விண்ணப்பிக்குமாறு தெரிவிக்கப்பட்டுள்ளது. இதன் மூலம் தகுதி உள்ள 300 மாணவர்கள் எஸ்.ஆர்.எம். பல்கலைக்கழகத்தில் கல்வி பயில்வர்.