தேர்தல் அறிக்கை பற்றி பேச ஓபிஎஸ், இபிஎஸ்-க்கு அருகதை இல்லை - திமுக எம்பி ஆ. ராசா

திமுக தேர்தல் அறிக்கை பற்றி கூறுவதற்கு எடப்பாடி பழனிசாமிக்கோ, ஓ. பன்னீர்செல்வதிற்கோ எந்த அருகதையும் இல்லை என வேட்பாளர்கள் அறிமுகக் கூட்ட நிகழ்ச்சியில் திமுக துணைப் பொதுச்செயலாளர் ஆ. இராசா எம்பி கூறியுள்ளார்.

பெரம்பலூர்:தமிழ்நாட்டில் பிப்ரவரி 19 அன்று நகர்ப்புற உள்ளாட்சித் தேர்தல் நடைபெறுவதால் அனைத்துக் கட்சிகளும் மும்முரமாகத் தேர்தல் பரப்புரையில் ஈடுபட்டுவருகின்றன. இந்நிலையில் பெரம்பலூர் மாவட்ட திமுக வேட்பாளர்களை அறிமுகப்படுத்தும் நிகழ்வு நேற்று இரவு (பிப்ரவரி 10) திமுக கழக அலுவலகத்தில் நடைபெற்றது.

இதில் திமுக துணைப் பொதுச்செயலாளரும் திமுக நாடாளுமன்ற உறுப்பினருமான ஆ. ராசா கலந்துகொண்டு சிறப்புரையாற்றினார். பெரம்பலூர் மாவட்டத்தில், பெரம்பலூர் நகராட்சி, குரும்பலூர், அரும்பாவூர், பூலாம்பாடி, லெப்பைக்குடிக்காடு பேரூராட்சிகளுக்குத் தேர்தலில் போட்டியிடும் வேட்பாளர்கள் அறிமுகப்படுத்தப்பட்டனர்.

பின்னர் ஆ. ராசா பேசுகையில், “கரோனா தொற்று காலத்திலும், மழைக் காலத்திலும் தமிழ்நாடு முதலமைச்சர் மு.க. ஸ்டாலின் அந்தச் சூழலை மிகவும் திறமையாகக் கையாண்டார். முன்னாள் முதலமைச்சர் எடப்பாடியோ, பன்னீர்செல்வமோ வீட்டை விட்டு வெளியேகூட வரவில்லை.

கரோனா பெருந்தொற்று, மழை வெள்ளம் ஆகிய இரு பெரும் சவால்களுக்கு இடையே, அவரே நேரில் களமிறங்கி கரோனா பெருந்தொற்றைக் கட்டுக்குள் கொண்டுவந்தவர். ஆயிரம் ரூபாய் தரவில்லை என்று எதிர்க்கட்சியினர் குற்றம் சுமத்திவருகின்றனர். ஸ்டாலின் தேர்தல் சமயத்தில் கொடுத்த வாக்குறுதிகளில் 90% வாக்குறுதிகளை நிறைவேற்றியிருக்கிறார்.

அதிமுக தேர்தல் வாக்குறுதிகளை நிறைவேற்றவில்லை!

விவசாய விளை பொருள்களுக்கு குறைந்தபட்ச ஆதார விலையைப் பெற்றுத் தருவேன் என்று 2011 தேர்தல் அறிக்கையில் கூறிய ஜெயலலிதாவோ, 20 ரூபாய்க்கு ஆவின் பால் பாக்கெட் தருவேன் என்று 2016 தேர்தல் அறிக்கையில் கூறிய எடப்பாடி பழனிசாமியோ, பன்னீர்செல்வமோ தேர்தல் அறிக்கையில் தெரிவித்தபடி வாக்குறுதிகளை நிறைவேற்றவில்லை.

திமுக தேர்தல் அறிக்கையைப் பற்றி கேள்வி எழுப்ப எடப்பாடிக்கோ, பன்னீர்செல்வத்துக்கோ எந்த அருகதையும் கிடையாது. எட்டு மாதத்தில் 90 விழுக்காடு தேர்தல் வாக்குறுதியை நிறைவேற்றிய முதலமைச்சருக்குத்தான் இந்தியாவின் நம்பர் ஒன் முதலமைச்சர் எனப்பெயர் கிடைத்துள்ளது.

நீட் குறித்து அண்ணா போல் சிந்திக்கிறார்!

நீட் தேர்வு குறித்து அண்ணாவும், கருணாநிதியும் ஒருமித்துப் பேசினால் எப்படி இருக்குமோ அந்த அளவுக்கு நேர்த்தியாக மத்திய அரசுக்கும், ஆளுநர் நடவடிக்கைக்கும் பதிலடி கொடுத்து, ஸ்டாலின் சட்டப்பேரவையில் பேசியுள்ளார்.

நாங்கள் ஆளுநரைத் திரும்பப்பெற வலியுறுத்தி தமிழ்நாடு நாடாளுமன்ற உறுப்பினர்கள் நாடாளுமன்றத்தின் மையப்பகுதிக்குச் சென்று குரல் கொடுத்துள்ளோம். பெரம்பலூர் நகராட்சியில் தினமும் தடையற்றக் காவிரி குடிநீர் பெற்றுத்தர ரூ.320 கோடியில் புதிய திட்ட அறிக்கை அரசுக்கு அனுப்பிவைக்கப்பட்டுள்ளது.

தேர்தல் முடிந்தவுடன் அத்திட்டம் நிறைவேற்றப்படும். பெரம்பலூர் மாவட்டத்திற்கான அரசு மருத்துவக்கல்லூரி விரைவில் வந்துசேரும்" எனத் தெரிவித்தார். இக்கூட்டத்தில் திமுக நிர்வாகிகள் பலர் கலந்துகொண்டனர்.

இதையும் படிங்க:'பாஜகவினர் மதத்தின் பெயரால் ஓட்டு பெறுகின்றனர்' - கனிமொழி எம்.பி.