கரோனா வைரஸ் நோய் தொற்றிலிருந்து காக்க தன்வந்திரி யாகம்

பெரம்பலூர் : கரோனா வைரஸ் நோய் தொற்றிலிருந்து உலகமக்களைக் காப்பதற்காக இந்து சமய அறநிலையத்துறை சார்பில் எளம்பலூர் கிராமத்தில் தன்வந்திரி யாகம் நடைபெற்றது.

உலக மக்களை பெருமளவில் அச்சுறுத்திக் கொண்டிருக்கின்ற கரோனா வைரஸ் நோய் தொற்று பரவாமல் இருக்க இந்தியா முழுவதும் ஊரடங்கு உத்தரவு பிறப்பிக்கப்பட்டுள்ளது.

இந்நிலையில், கரோனா வைரஸ் நோய் தொற்றிலிருந்து உலக மக்களை காப்பதற்காக இந்து சமய அறநிலையத்துறை சார்பில் பெரம்பலூர் மாவட்டம் எளம்பலூர் அருள்மிகு காமாட்சி உடனுறை ஏகாம்பரேஸ்வரர் திருக்கோயிலில் தன்வந்திரி யாகம் நடைபெற்றது.

இந்த யாகத்தில் பல்வேறு மூலிகை பொருள்கள் யாகத்தீயில் இடப்பட்டு சிறப்பு பூஜை நடைபெற்றது. அதனைத் தொடர்ந்து கலச தீர்த்தத்தால் அபிஷேகம் நடைபெற்றது. இந்த நிகழ்வில் திருக்கோயில் செயல்அலுவலர் அருண்பாண்டியன், கோவில் பணியாளர்கள் அர்ச்சகர்கள் மட்டும் கலந்து கொண்டனர்.