தமிழ்நாட்டில் நிலத்தடி நீர்மட்டம் குறைந்து போன மாவட்டங்களின் வரிசையில், பெரம்பலூர் மாவட்டம் முதலிடத்தில் உள்ளது. வறட்சியான இந்த பெரம்பலூர் மாவட்டத்தில் மக்கள் காசு கொடுத்து குடிநீர் வாங்கும் நிலை உள்ளது. இந்நிலையில், பல ஆண்டுகளாக உயிரைக்கொடுத்து போராடி, தற்போது நூற்றுக்கணக்கான மூலிகைத் தாவரங்களை வருங்கால தலைமுறைக்கு அடையாளம் காட்ட போராடுகிறார், பெரம்பலூர் மாவட்டத்தைச் சேர்ந்த 75 வயது இயற்கை ஆர்வலர் மோகனகிருஷ்ணன் அவரது மகன் மகேந்திரன்.
பெரம்பலூர் மாவட்டம், ஆலத்தூர் வட்டம் து.களத்தூர் கிராமத்தைச் சேர்ந்தவர் மோகனகிருஷ்ணன். தமிழ்நாடு அரசின் டான்சி நிறுவனத்தில் பணிபுரிந்து விருப்ப ஓய்வு பெற்று தனக்கு சொந்தமான 17 ஏக்கர் மானாவாரி நிலத்தில் மூலிகைப் பண்ணை அமைத்து பராமரித்து வருகிறார். இவரது முன்னோர்கள் இயற்கை வைத்தியர்கள் ஆக இருந்து மூலிகைத் தாவரங்களை வாங்கிப் பயன்படுத்திய நிலையில், மூலிகைத் தாவரங்களின் மீது ஏற்பட்ட ஆர்வம் காரணமாக, இரவு பகல் பாராது காடுகள் மலைகள், வெளி மாநிலங்களுக்குச் சென்று அரிய வகை மூலிகைத் தாவரங்களை தேடிப் பிடித்துக் கொண்டு வந்து, தனது பண்ணையில் நட்டு வளர்த்து பராமரித்து வருகிறார் மோகனகிருஷ்ணன்.
இவர் இதுவரை 700க்கும் மேற்பட்ட மூலிகைகளை அடையாளப்படுத்தி பாதுகாத்து வருகிறார். மூலிகை சேகரிப்பு மட்டுமின்றி பல்வேறு இடங்களில் நடைபெறும் இயற்கை வேளாண் கண்காட்சிகளிலும் தனது மூலிகைத் தாவரங்களை கொண்டு வந்து காட்சி செய்து விழிப்புணர்வு ஏற்படுத்தி வருகிறார். இவரது மூலிகைப் பண்ணைக்கு சித்த மருத்துவம், தாவரவியல் பாடப் பிரிவு மாணவர்கள், ஆராய்ச்சி மாணவர்கள், ஆயுர்வேத சித்த மருத்துவ மாணவர்கள் எனப் பலரும் வருகை தந்து பார்வையிட்டு பயன்பெற்று வருகின்றனர்.
மேலும், இவரது மூலிகை சேகரிப்பு சேவையைப் பாராட்டி மத்திய அரசும், மாநில அரசும் ஏராளமான சான்றிதழ்களும், பரிசுகளும் வழங்கி சிறப்பித்துள்ளது. இப்பகுதி மக்கள் இவரை மூலிகை நேசன் என்ற அடைமொழியோடு அழைக்கின்றனர்.