"திமுக தேச விரோத வேலைகளில் முழு ஈடுபாடு " ஹெச்.ராஜா கடும் விமர்சனம்!

"தமிழ்நாட்டில் தொடர்ந்து தேச விரோத வேலைகளில் திமுகவினர் செயல்படுவதை திருத்திக் கொள்ளாவிட்டால் திமுக ஆட்சி இருக்காது" என்று பாஜகவின் மூத்த தலைவர், ஹெச்.ராஜா பெரம்பலூரில் செய்தியாளிர்களிடம் தெரிவித்துள்ளார்.

பெரம்பலூர்: தமிழ்நாடு பாரதிய ஜனதா கட்சியின் கிராம மற்றும் நகர முன்னேற்ற கள ஆய்வு பணி பொறுப்பாளர்கள் கூட்டம் பெரம்பலூரில் உள்ள தனியார் கல்லூரி வளாகத்தில் நடைபெற்றது. அதன் பின்னர் செய்தியாளர்களை சந்தித்த பாஜகவின் முக்கிய தலைவர்களில் ஒருவரான ஹெச்.ராஜா, நாளுக்கு நாள் திராவிட முன்னேற்றக் கழகத்தினுடைய வன்முறையும், தேச விரோத செயல்களும், அதிகரித்துக் கொண்டே வருகிறது.

அதற்கு உதாரணமாக கிருஷ்ணகிரி மாவட்டத்தில் திமுக கவுன்சிலர் ஒருவரால், ஒரு ராணுவ வீரர் அடித்து கொலை செய்யப்பட்டுள்ளார். இது போன்ற வன்முறை செயல்களை திமுகவின் முக்கிய அமைச்சர்களிடம் இருந்து அந்த கவுன்சிலர் கற்றுக் கொண்டாரா? என்று தெரியவில்லை. இதற்கு காரணம் அக்கட்சியின் தலைமையே, தேச விரோதமாக தான் இருக்கிறது. நாற்றுப் பற்று இன்றி ஒன்றிய அரசு என்று பேசிய போது அவர்கள் தேச விரோதிகள் என்று நான் தெரிவித்திருந்தேன்.

அந்த அளவிற்கு தமிழ்நாட்டில் தேச விரோத மனப்பான்மை ஊட்டி வளர்க்கப்படுகிறது. எனவே இதனை திராவிட முன்னேற்றக் கழகம் திருத்திக் கொள்ளாவிட்டால் "இந்த ஆட்சி இருக்காது" என்றார். முதலமைச்சர் ஸ்டாலின், கருணாநிதியை விட மோசமான நபர் என்றும், கருணாநிதி இது போன்ற தேச விரோத வேலைகளை செய்ய மாட்டார் என்றும் தெரிவித்தார்.

ஸ்டாலினின் கையில் நிர்வாகமும் இல்லை, கட்சியும் இல்லை, குடும்பமும் இல்லை அவர் தத்தளித்துக் கொண்டிருக்கிறார். இதன் விளைவு தான், ஒரு ராணுவ வீரரை கொலை செய்யும் அளவிற்கு திமுக காரர்களுக்கு தைரியம் வந்துள்ளது. இது போன்ற செயல்கள் தொடர்ந்தால் தேச பக்தர்களாகிய நாங்கள் திமுக காரர்களை வெளியில் நடமாட விடமாட்டோம் என்று தெரிவித்தார்.

எனவே, திராவிட முன்னேற்றக் கழகத்தினர் தங்களை திருத்திக் கொள்ள வேண்டும் இல்லையென்றால் திருத்தப்படுவார்கள். தமிழ்நாட்டில் சட்டம் ஒழுங்கு சரி இல்லை, கொலை, கொள்ளை, வழிப்பறி மற்றும் திருட்டு போன்ற குற்ற சம்பவங்கள் தொடர்ந்து நடைபெற்று வருகிறது. ஒரே நாளில் 9 பேர் கொலை செய்யப்பட்ட சம்பவங்கள் கூட தமிழ்நாட்டில் அரங்கேறியுள்ளது.

மாநிலத்தில் சட்டம் ஒழுங்கு சரியில்லாத சூழலை மத்திய அரசுக்கு நேரடியாக அனுப்பும் அதிகாரம் பெற்றவர் ஆளுநர். எனவே, ஆளுநருக்கு நாங்கள் இது குறித்து விளக்குவோம் என்றார். பெரம்பலூரில் தொடர்ந்து கோவில் சிலைகள் சேதப்படுத்தப்பட்டு வருகிறது. இன்று கூட கோவில் சிலைகள் சேதப்படுத்தப்பட்டுள்ளது.

இதன் பின்னணியில் திமுகவினரும், இந்து சமய அறநிலைய துறையினரும் உள்ளதாகவே நான் கருதுகிறேன். இதற்கு முன்பு சிறுவாச்சூர் பெரியசாமி மலையில் சிலைகள் உடைக்கப்பட்ட பொழுது ஒரு அப்பாவியை குற்றவாளியாக நிறுத்தினார்கள்.

இதற்கு பல்வேறு காரணங்கள் உள்ளது என்று தெரிவித்த அவர், ஏன் இந்து சமய அறநிலையத்துறையினரே இந்த சிலை உடைப்பு சம்பவத்தை செய்திருக்கலாம் என்றார். எனவே திராவிட முன்னேற்றக் கழக அரசு எவ்வளவு சீக்கிரம் நீக்கப்படுகிறதோ, அவ்வளவு சீக்கிரம் சாதாரண மக்கள் நகை, பாதுகாப்பு, உயிர் பாதுகாப்புடன் வெளியில் நடமாட முடியும் என்றார்.

இதையும் படிங்க:சென்னையில் நிலநடுக்கம் வருமா,வராதா? - கட்டுமானப் பொறியாளர் சங்கத்தினர் தந்த அதிர்ச்சித் தகவல்!