சுகாதாரத் துறையின் கட்டுப்பாட்டில் கொண்டுவரப்பட்ட சில்லக்குடி!

பெரம்பலூர்: கரோனா தொற்று அதிகம் பாதிக்கப்பட்டுள்ள சில்லக்குடி, வீரம நல்லூர் ஆகிய பகுதிகள் சுகாதாரத் துறையினர் கட்டுப்பாட்டில் கொண்டுவரப்பட்டுள்ளன.

பெரம்பலூர் மாவட்டத்தில் இதுவரை 11 பேருக்கு கரோனா தொற்று உறுதிப்படுத்தப்பட்டுள்ளது. மருத்துவமனையில் சிகிச்சை பெற்றுவந்த இவர்களில், நான்கு பேர் குணமடைந்து வீடு திரும்பியுள்ளனர். இந்நிலையில், கரோனா தொற்று அதிகம் பாதிக்கப்பட்டுள்ள சில்லக்குடி, வீரம நல்லூர் பகுதிகள் சுகாதாரத் துறையினர் கட்டுப்பாட்டுக்குள் கொண்டுவரப்பட்டுள்ளன.

ஊர் முழுவதும் கிருமி நாசினி தெளித்து, அங்குள்ள நபர்கள் வெளியே செல்லாதவாறும், வெளி நபர்கள் உள்ளே வராத அளவிற்கும் தடுப்புவேலி அமைக்கப்பட்டுள்ளது. கரோனா நோய் தொற்று பாதித்த ஒருவர் பணிபுரிந்த துங்கபுரம் ஆரம்ப சுகாதார நிலையம் மூடப்பட்டுள்ளது.

மேலும், நோய்த் தொற்று பாதித்த அத்தியூரைச் சேர்ந்தவரின் மகள் பணிபுரிந்த பெரம்பலூர், கிருஷ்ணாபுரம் எஸ்.பி.ஐ. வங்கிகள் மூடப்பட்டு அங்கு பணிபுரிந்த 43 பணியாளர்களுக்கு கரோனா பரிசோதனை செய்யப்பட்டது.

மாவட்டத்தில் கரோனா நோய்த் தொற்று பாதித்தவர்களின் தொடர்பில் இருந்த 100க்கும் மேற்பட்டோருக்கு கரோனா பரிசோதனை மேற்கொள்ளப்பட்டது. இவர்களின் சோதனை முடிவுகள் வந்தபின்பு மாவட்டத்தில் கரோனா பாதித்தோரின் எண்ணிக்கை உயர வாய்ப்புள்ளது.

ஆந்திர மாநிலம், சென்னை உள்ளிட்ட பகுதிகளில் இருந்து பெரம்பலூர் வந்த 100க்கும் மேற்பட்டோர் தனிமைப்படுத்தப்பட்டுள்ளனர்.

இதையும் படிங்க:'கும்மியாட்டம் ஆடிய இளைஞர்கள்...' - கரோனா விழிப்புணர்வில் சூலூர் காவல் துறை!