திமுக ஆட்சிக்கு வந்தால் நீட் தேர்வை நீக்குவோம் - உதயநிதி

நாமக்கல்: திமுக ஆட்சிக்கு வந்தால் சட்டப்போராட்டத்தை சந்தித்தாவது நீட் தேர்வை நீக்குவோம் என அக்கட்சியின் இளைஞரணிச் செயலாளர் உதயநிதி ஸ்டாலின் தெரிவித்தார்.

நீட் தேர்வு எழுதவிருந்த நிலையில், ஒரேநாளில் மூன்றுபேர் உயிரிழந்த சம்பவம் தமிழ்நாடு முழுவதும் அதிர்வலையை ஏற்படுத்தியது. இதற்கு எதிர்க்கட்சிகள், சமூகநல ஆர்வலர்கள் நீட் தேர்வால் நடக்கும் கொலைகளை தடுத்து நிறுத்தக்கோரி மத்திய, மாநில அரசுகளைக் கடுமையாக விமர்சித்தனர். நீட் தேர்வுக்குப் பின்னால் இருக்கும் சர்வாதிகாரப்போக்கை மத்திய அரசு கைவிட வேண்டும் என்றும் வலியுறுத்தப்பட்டது.

இந்நிலையில், நாமக்கல் மாவட்டம் திருச்செங்கோட்டில் நீட் தேர்வால் தற்கொலை செய்துகொண்டு உயிரிழந்த மோதிலால் குடும்பத்திற்கு திமுக இளைஞரணி செயலாளர் உதயநிதி ஸ்டாலின் ஆறுதல் தெரிவித்தார். இதனைத்தொடர்ந்து அவரது குடும்பத்திற்கு திமுக இளைஞரணி சார்பாக ஐந்து லட்சம் ரூபாய் நிவாரண உதவியை வழங்கினார்.

பின்னர் செய்தியாளர்களிடம் கூறியதாவது, "இது தற்கொலை கிடையாது தொடர்ந்து கூறிவருகிறேன். பாசிச பாஜக ஆட்சியும், தமிழ்நாட்டை ஆளும் அடிமை ஈபிஎஸ், ஓபிஎஸ் ஆட்சியும் சேர்ந்து செய்த கொலைகள். அனைவரது எதிர்ப்பையும் பொருட்படுத்தாமல் மிக தந்திரமாக நீட் தேர்வை புகுத்தியுள்ளனர். இதனால் மாணவர்கள் மிகுந்த மன உளைச்சலுக்கு ஆளாகின்றனர்.

திமுக ஆட்சிக் காலத்தில் மருத்துவத் துறையில் தமிழ்நாடு தலைசிறந்து விளங்கியது. ஆனால், தற்போது அந்நிலை மாறியுள்ளது. மாணவர்கள் தற்கொலை செய்து கொள்வதற்கு முன்னர் தங்களது குடும்பத்தை ஒரு நிமிடம் நினைத்தால் தற்கொலை எண்ணமே தோன்றாது. திமுக ஆட்சிக்கு வந்தால், நீட் தேர்வை சட்டப்போராட்டம் செய்து ரத்து செய்வோம். தமிழ்நாடு அரசு ஜல்லிக்கட்டுக்கு சிறப்பு தனி வரைவுச் சட்டம் கொண்டு வந்து அனுமதி பெற்றது போல் நீட்டை தடுக்க ஏன் கொண்டு வரவில்லை.

நீட் தேர்வு அச்சத்தால் தமிழ்நாட்டில் ஒரே நாளில் மூன்று மாணவர்கள் தற்கொலை செய்து கொண்டது மிகுந்த வேதனையான ஒன்றாகும். இனியாவது மத்திய மாநில அரசுகள் நீட் தேர்வை ரத்து செய்ய வேண்டும்‌" என வலியுறுத்தினார்.

இதையும் படிங்க:'உயிருக்கு பயந்து காணொலி மூலம் செயல்படும் நீதிமன்றம் மாணவர்களை தேர்வு எழுத சொல்கிறது' - சூர்யா காட்டம்