ஈடிவி பாரத் தமிழ்நாடு செய்தி எதிரொலி: பயிர்களின் நோய் தாக்குதல் குறித்து உடனடி நடவடிக்கை!

நாமக்கல்: ஈடிவி பாரத் தமிழ்நாடு செய்தி எதிரொலியின் விளைவாக சின்ன வெங்காயத்தில் நோய் தாக்குதல் நடந்த விவசாய நிலங்களை வேளாண் ஆராய்ச்சியாளர்கள் நேரில் சென்று ஆய்வு நடத்தி நடவடிக்கை எடுப்பதாக உறுதியளித்துள்ளனர்.

நாமக்கல் மாவட்டத்தில் சில விவசாய நிலங்களில் பயிரிடப்பட்ட சின்ன வெங்காயம் நோய் தாக்குதலின் காரணமாக அழிந்து போவதாக வந்த புகாரை நமது செய்தியாளர்கள் ஈடிவி பாரத் தமிழ்நாடு இணைய ஊடகத்தில் காட்சிப்படுத்தினர். இது வேளாண் அலுவலர்கள் கவனத்திற்குச் சென்றதையடுத்து, உடனடியாக நேரில் சென்று ஆய்வு நடத்தி நடவடிக்கை எடுப்பதாக உறுதியளித்துள்ளனர்.

நாமக்கல் மாவட்டத்தில் குள்ளப்பநாயக்கன்பட்டி, கதிராநல்லூர், பாச்சல், கடந்தபட்டி, மொஞ்சனூர், வளையப்பட்டி, வெண்ணந்தூர், கல்லுபாளையம், பட்டணம், கைலாசம்பாளையம் உள்ளிட்ட பகுதிகளில் சாகுபடி செய்யப்பட்டுள்ள 2 ஆயிரம் ஏக்கர் பரப்பளவிலான வெங்காயம், அழுகல் மற்றும் பூஞ்சான நோய் தாக்குதலால் பாதிக்கப்பட்டு 30 விழுக்காடு முதல் 100 விழுக்காடு வரை பாதிக்கப்பட்டது.

நோய் தாக்குதலை தடுக்க அறிவுரை வழங்கிய ஆராய்ச்சியாளர்கள்

இதுகுறித்து பிரத்யேக செய்தி நவம்பர் மாதம் 8ஆம் தேதி ஈடிவி பாரத் தமிழ்நாட்டில் ஒளிபரப்பானது. இதன் எதிரொலியாக நாமக்கல் மக்களவை உறுப்பினர் சின்ராஜ், இதுகுறித்து விவசாயிகளிடம் கேட்டறிந்து உயர் அலுவலர்களை வெங்காயம் சாகுபடி செய்யப்பட்டுள்ள வயல்களை ஆய்வு செய்து விவசாயிகளுக்கு நிரந்தர தீர்வு கிடைக்க வேளாண்மைத் துறை உயர் அலுவலர்களுக்குத் தகவல் அனுப்பினார்.

இதனையடுத்து சென்னை தோட்டக்கலைத் துறை கூடுதல் இயக்குநர் கண்ணன், வேளாண் பல்கலைக் கழக விஞ்ஞானிகள் சண்முகம், வித்யா, தெய்வமணி, மக்களவை உறுப்பினர் சின்ராஜ், நாமக்கல் வேளாண்மை மற்றும் தோட்டக்கலைத் துறை அலுவலர்கள் இன்று வெங்காயம் சாகுபடி செய்யப்பட்டுள்ள வயல்களில் ஆய்வு மேற்கொண்டனர்.

நோய் தாக்குதல் குறித்து ஆய்வு மேற்கொள்ளும் அலுவலர்கள்

அப்போது பயிர் சாகுபடி முறைகள், நோய் தாக்குதல், பாதிப்புகள், நோய்களுக்குத் தெளிக்கப்பட்ட மருந்துகள், நீர் பாசன முறைகள் குறித்துக் கேட்டறிந்தும் நோய் தாக்கிய பயிர்களை ஆய்வு செய்து ஆராய்ச்சிக்காக எடுத்துச் சென்றனர். மேலும் நோய் தாக்குதலிலிருந்து வெங்காயத்தைக் காப்பது குறித்து ஆலோசனைகளையும் பாதிப்பு ஏற்பட்ட பயிர்களுக்குத் தெளிக்க வேண்டிய மருந்துகள் குறித்தும் எடுத்துரைத்தனர்.