பொதுமக்களுக்கு செயல்முறை விளக்கம் அளித்த வேட்பாளருக்கு எச்சரிக்கை

நாமக்கல் : வாக்களிப்பது குறித்து பொதுமக்களுக்கு செயல்முறை விளக்கம் அளித்த வேட்பாளர் ஒருவரை எச்சரித்த காவல் துறையினர், அவர் வைத்திருந்த பொருட்களை பறிமுதல் செய்தனர்.

நாமக்கல் மாவட்டத்தில் 8 ஒன்றியங்களுக்கான முதல்கட்ட தேர்தல் வெள்ளிக்கிழமை நிறைவடைந்தை அடுத்து, மாவட்டத்தில் உள்ள மற்ற 7 ஒன்றியங்களுக்கும் இரண்டாம் கட்டமாக வரும் திங்கள்கிழமை (30ஆம் தேதி) வாக்குப்பதிவு நடைபெறவுள்ளது.

இந்நிலையில், புதுசத்திரம் ஊராட்சி ஒன்றிய குழுவின் 13ஆவது வார்டு உறுப்பினர் பதவிக்காக செல்லப்பம்பட்டியைச் சேர்ந்த ரமேஷ் என்பவர் போட்டியிடுகிறார். இவர் உள்ளாட்சித் தேர்தல்களில் நான்கு வகையாக வாக்கு சீட்டுகளை வைத்து எவ்வாறு வாக்களிக்க வேண்டும் என்பது குறித்து செல்லப்பம்பட்டி மாரியம்மன் கோயில் அருகே இன்று காலை செயல் விளக்கம் அளித்தார்.

இதனையறிந்து அங்கு வந்த நல்லிபாளையும் காவல் ஆய்வாளர் கைலாசம் தலைமையிலான காவல் துறையினர், மாதிரி வாக்குப்பதிவு முறைகள் குறித்து பொதுமக்களுக்கு தனி நபர் யாரும் எவ்வித விளக்கமும் அளிக்கக்கூடாது எனக் கூறி அவர் கொண்டுவந்த மாதிரி வாக்குப்பெட்டி, வாக்குச் சீட்டுகள், சீல் உள்ளிட்டவைகளை பறிமுதல் செய்தனர்.

மேலும், இதுபோன்ற செயல்களில் இனி ஈடுபடக்கூடாது என ரமேஷை காவல் துறையினர் எச்சரித்தனர்.

இதையும் படிங்க : உயிர் குடிக்கும் மாசு!