குடும்ப பிரச்னை: தாய், மகள் ரயில் முன் பாய்ந்து தற்கொலை.!

நாமக்கல்: குடும்ப பிரச்னை காரணமாக தாயும், மகளும் ரயிலில் பாய்ந்து தற்கொலை செய்துக்கொண்ட சம்பவம் மோகனூர் பகுதியில் சோகத்தை ஏற்படுத்தியுள்ளது.

நாமக்கல் மாவட்டம், மோகனூர் அடுத்த புதூர் பகுதியைச் சேர்ந்தவர் கண்ணையன். கூலி தொழிலாளியான இவருக்கு கண்ணகி என்ற மனைவியும், அகல்யா என்ற மகளும் உள்ளனர். இந்நிலையில் நேற்று ஆடி பெருக்கை முன்னிட்டு கண்ணையன் குடும்பத்தாருடன் அந்தப் பகுதியில் உள்ள கோயிலுக்கு சென்றுவிட்டு இரவு வீட்டிற்கு திரும்பி வந்த கணவன்-மனைவிக்கு இடையே தகராறு ஏற்பட்டுள்ளது.

இதில் கோபித்து கொண்டு கண்ணகி தனது மகளை கூட்டிக் கொண்டு வீட்டை விட்டு வெளியேறியுள்ளார். நீண்ட நேரமாகியும் அவர்கள் வராததால், அவரது உறவினர்கள் இருவரையும் இரவு முழுவதும் தேடிய நிலையில் இன்று காலையில் மோகனூர் ரயில்நிலையம் அருகே இருவரும் சடலமாக கிடப்பதாக அக்கம்பக்கத்தினர் தெரிவித்தனர்.

இதனையடுத்து உறவினர்கள் கொடுத்த தகவலின் பேரில் சம்பவ இடத்திற்கு வந்த காவல்துறையினர் இரு உடல்களையும் மீட்டு உடற்கூறு ஆய்விற்காக அரசு மருத்துவமனைக்கு அனுப்பி வைத்தனர். பின்னர் இதுதொடர்பாக வழக்குப்பதிவு செய்து விசாரணை மேற்கொண்டு வருகின்றனர்.