நாமக்கல் மண்டலத்தில் சுமார் 1,100 கோழிப் பண்ணைகள் வரை உள்ளன. இங்கு 5 கோடி கோழிகள் மூலம், நாள்தோறும் 4 கோடி முட்டைகள் உற்பத்தியாகிறது. தற்போது கோடை காலமாக இருப்பதாலும், பள்ளிகள் விடுமுறையாலும் முட்டைகள் பெருமளவு பண்ணைகளில் தேங்கி வருகின்றன. பிற மண்டலங்களைக் காட்டிலும், நாமக்கல் மண்டலத்தில் முட்டை விலை அதிகமாக இருப்பதால், வியாபாரிகளும், பொதுமக்களும் வாங்குவதில் ஆர்வம்காட்ட மறுக்கின்றனர்.வியாபாரிகள் குறைந்த விலை கிடைக்கும் அண்டை மாநிலங்களை தேடி செல்கின்றனர்.
தேசிய முட்டை ஒருங்கிணைப்புக் குழு அதிகப்படியான விலை வைப்பதாக கூறி, நாமக்கல் மண்டல முட்டை உற்பத்தியாளர்கள் சங்கம் என்ற ஒன்று உதயமானது. அவர்கள், தேசிய முட்டை ஒருங்கிணைப்புக் குழு நிர்ணயிக்கும் விலையைக் காட்டிலும் 50 காசுகள் வரை குறைத்தே விலை நிர்ணயம் செய்கின்றனர். அவ்வாறு இருந்தும் வியாபாரிகள் முட்டைகளை வாங்க முன்வருவதில்லை. இதனால், நாமக்கல் மண்டலத்தில் மட்டும் சுமார் 12 கோடி அளவில் முட்டைகள் தேக்கமடைந்துள்ளன.