ஊரடங்கில் ரத்த பற்றாக்குறை ஏற்படலாம்... முன்னெச்சரிக்கையாக நாமக்கல்லில் ரத்த தானம் முகாம்

நாமக்கல்: அவசர நேரத்தில் ரத்த பற்றாக்குறை ஏற்பட்டுவிடக்கூடாது என்ற காரணத்தினால் முன்னெச்சரிக்கையாக நடைபெற்ற ரத்த தான முகாமில் 100க்கும் மேற்பட்ட தன்னார்வலர்கள் ஆர்வமுடன் பங்கேற்றனர்.

கரோனா அச்சுறுத்தல் காரணமாக தமிழ்நாட்டில் ஊரடங்கு பிறப்பிக்கப்பட்டுள்ளது. மக்கள் அனைவரும் வீட்டிலேயே இருக்குமாறு அறிவுறுத்தியுள்ளனர். இந்நிலையில், நாமக்கல் அரசு மருத்துவக் கல்லூரி மருத்துவமனையில் ரத்தத்தின் இருப்பு கணிசமாக குறைந்துள்ளது. இதனால், பிரசவத்திற்காக அனுமதிக்கப்பட்ட பெண்களுக்கு அறுவை சிகிச்சைக்கு பின்னர் ரத்தம் கிடைக்காத சூழ்நிலை ஏற்படவும் வாய்ப்புள்ளது.

இதைக் கருத்தில்கொண்டு, நாமக்கல் மாவட்ட ஆட்சியர் மெகராஜ் அனுமதியுடன் இந்தியன் ரெட் கிராஸ் சொசைட்டி சார்பில் நாமக்கல் அரசு பெண்கள் மேல்நிலைப் பள்ளியில் ரத்த தானம் முகாம் நடைபெற்றது.

இதில் 100க்கும் மேற்பட்ட தன்னார்வலர்கள் ஆர்வமுடன் பங்கேற்றனர். இதில் பெறப்பட்ட ரத்தம் நாமக்கல் அரசு மருத்துவக் கல்லூரி மருத்துவமனையில் பிரசவத்திற்காக அனுமதிக்கப்பட்ட கர்ப்பிணி பெண்களுக்கு வழங்க இருப்பில் வைக்கப்படும் என சுகாதாரத் துறையினர் தெரிவித்தனர்.

இதையும் படிங்க:சென்னையில் வீடு வீடாக ஆய்வு: இன்று மட்டும் 400 பேருக்கு சிறு பாதிப்புகள்!