நாமக்கல் மாவட்டம் ஜேடர்பாளையம் காவல் நிலைய எல்லைக்குட்பட்ட கபிலர்மலையில் பூட்டியிருந்த ஒரு வீட்டில் பூட்டை உடைத்து நுழைந்து கடந்த ஜூன் 26ஆம் தேதியன்று இரவில் 18 சவரன் தங்க நகைகளும் திருடப்பட்டதாகவும், அன்று இரவே, அதே பகுதியில் பூட்டியிருந்த மற்றொரு வீட்டில் ஒன்பது சவரன் தங்க நகையுடன் பணம் ரூ. 50 ஆயிரமும் திருடப்பட்டதாகவும் அறியப்படுகிறது.
கடந்த ஜூலை 30ஆம் தேதியன்று இரவு அண்ணா நகரில் உள்ள ஒரு வீட்டில் நுழைந்து ஒன்பது சவரன் தங்க நகைகளும், அடுத்து ஆகஸ்ட் 22ஆம் தேதியன்று உரம்பூர் பகுதியில் ஐந்து சவரன் தாலிச் சங்கிலியை திருடிச் சென்றதாக அந்தந்த பகுதிகளுக்கு உட்பட்ட காவல் நிலையங்களில் வழக்குகள் பதிவு செய்யப்பட்டன.
பின்னர் நாமக்கல் மாவட்ட காவல்கண்காணிப்பாளர் அருளரசு உத்தரவின்படி குற்றவாளிகளைப் பிடிக்க தனிப்படை அமைக்கப்பட்டது. இந்நிலையில் நேற்று சோழசிராமணி அருகில், தனிப்படையினர் தீவிர வாகன தணிக்கையில் ஈடுபட்டிருந்தபோது இருசக்கர வாகனத்தில் வந்தவர் ஒருவர் காவல்துறையினரைக் கண்டதும் திரும்பி செல்ல முற்பட்டதாகத் தெரிகிறது. இதைத் தொடர்ந்து அவரைத் தனிப்படையினர் பிடித்து விசாரித்ததில் அவரது பெயர் பூச்சி கண்ணன் (எ) அருண்ராஜ் என்றும்; ராமநாதபுரம் மாவட்டத்தைச் சேர்ந்தவர் என்றும் தெரியவந்தது. மேலும் விசாரித்ததில் பூச்சிக்கண்ணனும், அவரது கூட்டாளிகள் முனியாண்டி (42), முத்து முருகன் (40), ஆகிய மூவரும் சேர்ந்து பள்ளிபாளையத்தில் தங்கிக் கொண்டு, பகலில் சாணைப் பிடிப்பது போல் சென்று, பூட்டிய வீடுகளை நோட்டமிட்டு, இரவில் வீட்டின் பூட்டுகளை உடைத்து திருடுவதை வழக்கமாக கொண்டிருந்திருக்கின்றனர். அதேபோல்,மூவரும் கபிலர்மலை பகுதியில் ஒரே நாளில் இரண்டு வீடுகளில் திருடியதையும், வேலூர், கொளக்காட்டுப்புதூரில் உள்ள வீட்டில் திருடியதையும் மற்றும் வேலூர், உரம்பூர் பகுதியில் ஒரு வீட்டில் நுழைந்து திருடியதையும் ஒப்புக் கொண்டனர்.