நிவர் புயல் காரணமாக மின்துறையில் ரூபாய் 15 கோடி சேதம் - அமைச்சர் தங்கமணி

நாமக்கல் : நிவர் புயலால் மின்துறையில் இதுவரை ரூபாய் 15 கோடி மதிப்பிலான சேதம் ஏற்பட்டுள்ளதாக தமிழ்நாடு மின்சாரத்துறை அமைச்சர் தங்கமணி தகவல் தெரிவித்துள்ளார்.

நாமக்கல் திருச்செங்கோட்டில் அரசு சார்பில் நடைபெற்ற பல்வேறு நிகழ்ச்சிகளில் அமைச்சர் தங்கமணி இன்று (நவ.27) கலந்துகொண்டார்.

பழைய பேருந்து நிலையம் அருகே அமைக்கப் பட்டுள்ள அம்மா இ-சேவை மையத்தை திறந்து வைத்த அவர் அமைப்பு சாரா தொழிலாளர்களுக்கு அடையாள அட்டைகள், முதியோர் உதவித் தொகைக்கான ஆணைகள் ஆகியவற்றை வழங்கினார்.

பின்னர் செய்தியாளர்களை சந்தித்த பேசிய அவர்,‌ “நிவர் புயலால் பாதிக்கப்பட்ட விழுப்புரம் மற்றும் கடலூர் மாவட்டங்களில் 100 % மின் இணைப்பு வழங்கப்பட்டுள்ளது. சென்னையை பொருத்தவரை 95 % மின்இணைப்புகள் வழங்கப்பட்டுள்ளது. புயலால் 2,488 மின்கம்பங்கள் மற்றும் 108 மின்மாற்றிகள் சேதம் அடைந்துள்ளது. இதனால் மின்வாரியத்திற்கு 15 கோடி ரூபாய் மதிப்பிலான பொருள்கள் சேதமடைந்துள்ளது.

சென்னையில் பெரும்பாக்கம், மடிப்பாக்கம், பள்ளிக்கரணை, பகுதிகளில் தண்ணீர் அதிகம் உள்ளது. வரும் காலங்களில் அந்த பகுதிகளிலும் முழுமையாக புதைவட மின்கம்பிகள் அமைக்கப்படும். நிவர் புயலை விட வேகமாக தமிழ்நாடு அரசு செயல்பட்டதால் பாதிப்புகள் குறைக்கப்பட்டன”என தெரிவித்தார்.

இதையும் படிங்க :விமானிக்கு திடீர் நெஞ்சு வலி: பயணிகள் அவதி!