திருவாவடுதுறை ஆதீனம் 24-வது குருமகா சன்னிதானம் தீபாவளி அருளாசி

தீபாவளி திருநாளை முன்னிட்டு திருவாவடுதுறை ஆதீனம் 24-வது குருமகா சன்னிதானம் மக்களுக்கு அருளாசி வழங்கினார்.

மயிலாடுதுறை: தமிழ்நாட்டில் தொன்மைவாய்ந்த ஆதீனங்களில் ஒன்றான திருவாவடுதுறை ஆதீனத்தின் 24-ஆவது குருமகா சன்னிதானம் ஸ்ரீலஸ்ரீ அம்பலவாண தேசிக பரமாசாரிய சுவாமிகள் தீபாவளி அருளாசி வெளியிட்டுள்ளார்.

இதுகுறித்து செய்தியாளர்களை சந்தித்த அவர் கூறியதாவது, “உள்ளத்தில் புத்துணர்வை பெருகச் செய்து வாழ்வில் நம்பிக்கை ஒளியை தூண்டுவதே நம் பண்டிகைகள் ஆகும். அம்முறையில் தீபாவளி மிகவும் குறிப்பிடத்தக்கது. புத்தாடை, வாணவேடிக்கை, சுவையான தின்பண்டங்கள் என தீபாவளியை வளப்படுத்தும் அம்சங்கள் பல உள்ளன.

இருப்பினும் அதிகாலையில் நீராடுதல் தீபாவளியின் மிகச் சிறப்பான அம்சமாகும். இந்த நீராடல் கங்கை நதியில் நீராடுதலுக்கு சமம். ஆகையால் இது கங்கா ஸ்தானம் என்று சொல்லப்படுகிறது. கடவுளை, குருவை பெற்றோரை வழிபட்டு பண்டிகையை கொண்டாட வேண்டும். மனம் மகிழ்ச்சியாக உள்ள தருணம் சிறப்பான எதிர்கால திட்டங்களை உருவாக்க ஏற்ற தருணமாகும்.

நம் கடந்தகால குறைபாடுகளை களைவதற்கும், பழைய நற்பண்புகளோடு, புதிய நற்பண்புகளை வளர்த்துக் கொள்வதற்கும் இதுவே உகந்த காலமாகும். இக்காலத்தில் கடவுள் நமக்கு மிகச் சிறந்த பாடத்தை கற்பித்து வருகிறார். நமது நலனில் மட்டுமன்றி நாட்டு நலனிலும் நாம் அக்கறை காட்ட வேண்டும்.

இந்த அக்கறை ஒன்றே இன்றளவும் நமக்கு பெரும் சவாலாக இருந்து வரும் பெருந்தொற்றை ஒழிப்பதற்கு துணை புரியும். நம் குழந்தைகளுக்கு தெய்வ பக்தியோடு தேச பக்தியையும், நம் கலாச்சார சிறப்புகளை கற்றுக்கொடுக்க வேண்டும்.

இந்த தீபாவளி திருநாள் மக்கள் யாவரும் எல்லா வளங்களையும் பெற்று மகிழ்ச்சியும் நிம்மதியும் நிலைபெற வேண்டும் என ஞானமா நடராஜ பெருமான் திருவடி மலர்களை சிந்தித்து வாழ்த்துகின்றோம்” என்றார்.