சீர்காழி இரட்டை கொலை வழக்கு: என்கவுன்ட்டர் நடந்த இடத்தில் சிபிசிஐடி ஆய்வு!

மயிலாடுதுறை: சீர்காழி இரட்டை கொலை, கொள்ளை சம்பவ வழக்கு தொடர்பாக சிபிசிஐடி எஸ்.பி. ரவி, காவல் துறையினர் என்கவுன்ட்டர் நடத்திய இடத்தை நேரில் ஆய்வு செய்தார்.

மயிலாடுதுறை மாவட்டம் சீர்காழியில் நகைக்கடை அதிபர் தன்ராஜ் சவுத்ரியின் வீட்டுக்குள் புகுந்து அவரது மனைவி, மகன் ஆகியோரை கொலைசெய்து 12.5 கிலோ நகை, ரூ.6.90 லட்சம் ரொக்கத்தை நான்கு பேர் கொண்ட கும்பல் கொள்ளையடித்து சென்றனர்.

இதில், தொடர்புடைய வடமாநில கொள்ளையன் மஹிபால் சிங்கை காவல் துறையினர் என்கவுன்ட்டரில் சுட்டுக் கொன்றனர். மேலும் மணிஷ், ரமேஷ் பாட்டில், கர்ணாராம் ஆகியோர் கைதுசெய்யப்பட்டு சீர்காழி நீதிமன்றத்தில் முன்னிறுத்தப்பட்டு, நீதிமன்ற காவலில் வைக்கப்பட்டுள்ளனர்.

இந்நிலையில் இந்த வழக்கானது கடந்த பிப்ரவரி நான்காம் தேதி சிபிசிஐடி காவல் துறைக்கு மாற்றப்பட்டது. அதனைத் தொடர்ந்து எஸ்.பி. ரவி தலைமையிலான சிபிசிஐடி அலுவலர்கள், என்கவுன்ட்ர் நடத்தப்பட்ட எருக்கூர் கிராமத்தில் உள்ள சவுக்கு தோப்பில் நேரில் ஆய்வு செய்தனர்.

இதையும் படிங்க:100 அடி பள்ளத்தில் கவிழ்ந்த வேன்: சென்னை ஐடி ஊழியர்கள் 14 பேர் காயம்