காரைக்கால்:சனிப்பெயர்ச்சியில் இன்று மாலை சனிபகவான் மகர ராசியில் இருந்து கும்ப ராசிக்கு இடம்பெயரும் நிலையில், திருநள்ளாறு ஸ்ரீ தர்ப்பாரண்யேஸ்வரர் கோயிலில், அதிகாலை முதலே பல்லாயிரக்கணக்கான பக்தர்கள் வருகை புரிந்து, நளன் தீர்த்த குளத்தில் புனித நீராடி, 3 மணி நேரத்திற்கு மேலாக நீண்ட வரிசையில் காத்திருந்து சாமி தரிசனம் செய்தனர்.
சனிபெயர்ச்சியை முன்னிட்டு, திருநள்ளாறு ஸ்ரீதர்ப்பாரண்யேஸ்வரர் கோயிலில் மாணிக்கவாசகர் புறப்பாடு வெகு விமர்சையாக நடைபெற்றது. ஸ்ரீசனி பகவான் வெள்ளி கவசத்தில் பக்தர்களுக்கு காட்சியளித்தார். தொடர்ந்து, நிகழ்ச்சியில் செண்பக தியாகராஜர் மற்றும் பிராண அம்பிகை உற்சவவர்கள் எழுந்தருளி பக்தர்களுக்கு அருள் பாலித்தனர்.
புதுச்சேரி மாநிலம், காரைக்கால் அடுத்துள்ள திருநள்ளாறில் அமைந்துள்ள உலக பிரசித்தி பெற்ற ஸ்ரீதர்ப்பாரண்யேஸ்வரர் கோயிலில், ஸ்ரீ சனீஸ்வர பகவானுக்கு தனி சன்னதி அமைந்துள்ளது. இங்கு சனிக்கிழமைகளில் ஏராளமான பக்தர்கள் சாமி தரிசனம் செய்வது வழக்கம். இங்கு நடைபெறும் சனிப்பெயர்ச்சி பிரசித்தி பெற்றதாகும்.
இரண்டரை ஆண்டுகளுக்கு ஒருமுறை நடைபெறும் சனிப்பெயர்ச்சி, இன்று நடைபெற உள்ளது. இன்று மாலை 5.20 மணிக்கு ஸ்ரீ சனீஸ்வர பகவான் மகர ராசியில் இருந்து கும்ப ராசிக்கு இடம் பெயர்கிறார். இதனால், திருநள்ளாறில் ஏராளமான பக்தர்கள் குவிந்துள்ளனர்.