நள்ளிரவில் வீடுகளை நோட்டமிட்ட அடையாளம் தெரியாத கும்பல்

மயிலாடுதுறை பெசண்ட் நகரில் நள்ளிரவு வேலைகளில் வீடுகளில் நோட்டமிடும் அடையாளம் தெரியாத கும்பல் குறித்த சிசிடிவி பதிவு வெளியாகியுள்ளது. இது குறித்து ஆதாரத்துடன் புகார் அளித்தும் காவல்துறை மெத்தனம் காட்டுவதாக அப்பகுதி மக்கள் குற்றம்சாட்டியுள்ளனர்.

மயிலாடுதுறை:பெசன்ட் நகரில் வீட்டுவாசலில் நின்றிருந்த பெண்ணிடம் 5 பவுன் தங்க சங்கிலியை அடையாளம் தெரியாத நபர்கள் சமீபத்தில் பறித்துச் சென்றனர்.

மேலும், அப்பகுதி கோயில் உண்டியல் உடைத்து பணம் திருடப்பட்டது. இதையொட்டி,பாதுகாப்பு காரணங்களுக்காக குடியிருப்புவாசிகள் ஒன்றிணைந்து ரூ.2 லட்சம் செலவில் அந்நகரில் 18 இடங்களில் சிசிடிவி கேமராக்களை அமைத்துள்ளனர். அதன் ஒளிபரப்பை குடியிருப்புவாசிகள் அனைவரும் பார்த்துக்கொள்ளும் வகையில் மொபைல் போனுக்கு இணைப்பு வழங்கப்பட்டுள்ளது.

இந்நிலையில், 4 நாட்களுக்கு முன்பு அப்பகுதியில் நள்ளிரவில் 3 இளைஞர்கள் வீடுவீடாகச் சென்று நோட்டமிட்டுள்ளனர். சத்தம்கேட்ட குடியிருப்புவாசி ஒருவர் மொபைல் போனில் பார்த்தபோது, வெளியில் மர்மநபர்கள் திரிவதைக் கண்டு, போலீஸாருக்கு தகவல் தந்துள்ளார். இதற்கிடையில், மர்மநபர்கள் வந்த வாகனத்தில் பெட்ரோல் தீர்ந்து நின்றுவிட்டதால், அவர்கள் அப்பகுதியில் நிறுத்தியிருந்த டூவீலரில் பெட்ரோல் திருடி அதனை அவர்களது வாகனத்தில் ஊற்ற வந்தபோது, காவல்துறை வந்ததால் அவர்கள் அங்கிருந்து தப்பியோடினர்.

மெத்தனத்தில் காவல்துறை

இதையடுத்து, காவலர்கள் அந்த வாகனத்தை பறிமுதல் செய்து சென்றனர். இந்த வீடியோ காட்சியில் திருட வந்தவர்களின் முகம், வாகன எண் ஆகியவை தெளிவாகத் தெரிந்தும் காவல்துறையினர் எந்தவித நடவடிக்கையும் எடுக்காமல் மெத்தனமாக உள்ளனர்.

இந்த வீடியோவை வெளியிட்ட குடியிருப்புவாசிகள் கூறுகையில்,’எங்கள் பகுதியில் சிசிடிவி பொருத்தியதே குற்றம் நடக்காமல் தடுக்கவும், குற்றவாளிகளை அடையாளம் காணவும்தான். ஆனால், குற்றச்செயலில் ஈடுபட்டவர்களின் ஆதாரங்களை கொடுத்தும் நடவடிக்கை எடுக்க தயங்குகின்றனர்.

இப்பகுதியில் குற்றத்தில் ஈடுபட்டவர்களைக் கண்டறிந்து நடவடிக்கை எடுத்தால், மாவட்டத்தின் பிற பகுதிகளில் வசிக்கும் மக்கள் தங்கள் பகுதியில் சிசிடிவியை பொருத்துவார்கள். அதன்மூலம் மாவட்டத்தில் குற்றச்சம்பவங்கள் நடக்காமல் தடுக்கலாம். எனவே,காவல்துறையினர் விரைந்து நடவடிக்கை எடுக்க வேண்டும்” என்று கேட்டுக்கொண்டார்.