வடகிழக்கு பருவமழையை எதிர்கொள்ளத் தயார் - வருவாய் ஆணையர் தகவல்

நாகை: வடகிழக்கு பருவமழையின்போது பாதிப்பு ஏற்பட்டால், அதனை எதிர்கொள்ளவும், நிர்வாக வசதிக்காகவும், கூடுதல் ஐஏஎஸ் அலுவலர்கள் நியமிக்கப்பட்டுள்ளதாக வருவாய் நிர்வாக ஆணையர் ராதாகிருஷ்ணன் தெரிவித்துள்ளார்.

வடகிழக்கு பருவமழை எதிர்கொள்வது குறித்த ஆலோசனைக் கூட்டம் நாகை ஆட்சியர் அலுவலகத்தில் நடைபெற்றது. இதில் வருவாய் நிர்வாக ஆணையர் ராதாகிருஷ்ணன் தலைமை தாங்கினார். கூட்டத்திற்கு பின் செய்தியாளர்களைச் சந்தித்த அவர், ‘காஞ்சிபுரம், திருவள்ளூர், போன்ற மாவட்டங்கள் பெருநகரம் என்பதாலும், பெருவெள்ளம் வந்தால் அதனை கையாள்வதற்கு ஏதுவாகவும் நிர்வாக வசதிக்காக கூடுதலாக மூத்த ஐஏஎஸ் அலுவலர்கள் வடகிழக்கு பருவமழை பணிக்காக நியமிக்கப்பட்டுள்ளனர்.

இவ்வாண்டு வடகிழக்கு பருவமழை சராசரி அளவைவிட 40 செ.மீ அளவிற்குக் கூடுதலாக கிடைக்கும் என கணிக்கப்பட்டுள்ளது. மேலும் நீலகிரி போன்ற மலைப்பிரதேச பகுதிகளில் பருவமழையின்போது நிலச்சரிவு ஏற்பட்டால், அதனை சரி செய்வதற்கும் கூடுதல் அலுவலர்கள் பணியில் தயார் நிலையில் இருக்கின்றனர். நாகை உள்ளிட்ட டெல்டா பகுதிகளில் கூடுதல் மழைப் பொழிவின்போது வெள்ளம் ஏற்பட்டால், அதனை எதிர்கொள்வதற்கு அனைத்துத் துறை அலுவலர்களும் தயார் நிலையில் முடுக்கி விடப்பட்டுள்ளனர்’ என்றார்.

இதையும் படிங்க: வடகிழக்குப் பருவமழை தொடங்கவுள்ளதால் முல்லைப்பெரியாறு அணை ஆய்வு!