நாகையில் வலுக்கும் மீனவர் போராட்டம், பெருகும் ஆதரவு!

நாகை அடுத்துள்ள சாமந்தான்பேட்டை மீனவ கிராமத்திற்கு தூண்டில் வளைவுடன் கூடிய மீன் இறங்கு தளம் அமைக்கக் கோரி நடைபெற்று வரும் போராட்டத்திற்கு நாகை மாவட்ட தலைமை மீனவ கிராமமான அக்கரைப்பேட்டை பஞ்சாயத்தார்கள் ஆதரவு தெரிவித்துள்ளனர்.

நாகப்பட்டினம்:நாகை அடுத்துள்ள சாமந்தான்பேட்டை மீனவ கிராமத்திற்கு தூண்டில் வளைவுடன் கூடிய மீன் இறங்கு தளம் அமைக்கப்படும் என கடந்த 2015ஆம் ஆண்டு அதிமுக ஆட்சியில் சட்டப்பேரவையில் 110 விதியின் கீழ் அறிவிக்கப்பட்டது.

இருப்பினும், இன்றளவும் அதற்கான பணிகள் தொடங்கப்படாமல் இருப்பதைக் கண்டித்து அப்பகுதி மீனவர்கள் கடந்த மூன்று நாள்களாக தொழில் மறியல், காத்திருப்பு போராட்டத்தில் ஈடுபட்டுவருகின்றனர்.

இரண்டாவதாக நாளாக நடைபெற்ற சாமந்தான்பேட்டை கிராம மீனவர்களின் போராட்டத்தில் மாவட்ட நிர்வாகம் சார்பாக மீன்வளத்துறை அலுவலர்கள் பேச்சுவார்த்தையில் ஈடுபட்டனர்.

அப்போது, புதிய திட்டம் தயார் செய்து தரப்படும் என அலுவலர்கள் கூறியதற்கு பழைய திட்டத்திலே கட்டுமானப் பணிகளை தொடங்கவேண்டும் என மீனவர்கள் வலியுறுத்தினர்.

அலுவலர்களுடன் பேச்சுவார்த்தையில் உடன்பாடு எட்டப்படாத நிலையில், நேற்றிரவு தீப்பந்தம் ஏந்தி போராட்டத்தில் ஈடுபட்டனர்.

இதைத்தொடர்ந்து, உடனடியாக தங்கள் கோரிக்கைகளை நிறைவேற்றவேண்டும் எனக்கூறி மீனவர்கள் குடும்பத்துடன் சேர்த்து கடலில் இறங்கி போராட்டத்தில் ஈடுபட்டனர்.

இன்று போராட்டம் நடக்கும் இடத்திற்கு வந்த நாகை மாவட்ட தலைமை மீனவ கிராமமான அக்கரைப்பேட்டை பஞ்சாயத்தார்கள் போராட்டத்திற்கு தங்களது ஆதரவை தெரிவித்துள்ளனர்.

மேலும், கோரிக்கை நிறைவேற்றப்படவில்லை என்றால் நாகை தாலுகா மீனவர்கள் நாளை முதல் வேலை நிறுத்தப் போராட்டத்தில் ஈடுபடப்போவதாகவும் தெரிவித்துள்னர்.

இதையும் படிங்க: அதிமுக அரசை கண்டித்து மீனவர்கள் கடலில் இறங்கி போராட்டம்!