ஜாதி பெயரைச் சொல்லி துன்புறுத்தல்: ராணுவ வீரரின் மகள் கண்ணீர்

நாகப்பட்டினம்: மயிலாடுதுறை அருகே ஜாதி பெயரைச் சொல்லி சிலர் துன்புறுத்துவதாக மத்திய பாதுகாப்பு படை வீரரின் மகள் கண்ணீர் மல்க தெரிவித்தார்.

நாகப்பட்டினம் மாவட்டம் மயிலாடுதுறை அருகே செம்பனார் கோயில் மேலமுக்கூட்டுப் பகுதியைச் சேர்ந்தவர் மனோகரன்(42). இவர் அஸ்ஸாம் மாநில எல்லையோரப் பகுதியில் மத்திய பாதுகாப்பு படை வீரராக உள்ளார். அவரது மனைவி ஜெயலட்சுமி(40), மூன்று மகள்கள் ஆகியோர் செம்பனார் கோயிலில் வசித்து வருகின்றனர்.

இவர்களுக்கும் பக்கத்து வீட்டுக்காரரான ஞானவேல் குடும்பத்தினருக்கும் நீண்ட நாட்களாக நிலத் தகராறு இருந்துள்ளது. இந்நிலையில் ராணுவ வீரரின் இடத்தில் உள்ள மரத்தை ஞானவேல், அவரது குடும்பத்தினர் வெட்டியுள்ளனர். இதை தட்டிக் கேட்டதால் ராணுவ வீரரின் மனைவி ஜெயலட்சுமியை ஞானவேல், அவரது மனைவி, மகன் ஆகியோர் சேர்ந்து அடித்து துன்புறுத்தியுள்ளனர்.

தற்போது, ஜெயலட்சுமி மயிலாடுதுறை அரசு மருத்துவமனையில் சிகிச்சைக்காக சேர்க்கப்பட்டுள்ளார். பக்கத்து வீட்டுக்காரரால் தாங்கள் நிம்மதி இழந்துள்ளதாகவும், சாதி குறித்து அடிக்கடி திட்டிவருவதாகவும் ராணுவ வீரரின் மகள் கண்ணீர் மல்க வருத்தம் தெரிவித்தார். இது குறித்து காவல் துறையினர் உரிய நடவடிக்கை எடுக்க வேண்டும் எனவும் அவர் கோரிக்கை விடுத்துள்ளார்.

இதையும் படிங்க: சென்னை பெண்களிடம் செயின் பறிப்பு - கொள்ளை கும்பல் கைது