மாட்டுக்கறி சாப்பிட்ட இஸ்லாமிய இளைஞரை தாக்கிய 4 பேர் கைது!

நாகை: பொரவச்சேரி கிராமத்தைச் சேர்ந்த இஸ்லாமிய இளைஞர் மாட்டுக்கறி சாப்பிட்டதை முகநூலில் பதிவிட்டதற்காக கடுமையாக தாக்கிய நான்கு பேர் கைது செய்யப்பட்டுள்ளனர்.

நாகை மாவட்டம் அடுத்துள்ள, பொரவச்சேரி கிராமத்தைச் சேர்ந்தவர் முஹம்மது பைசான். இவர் மாட்டு இறைச்சி சூப் சாப்பிட்ட புகைப்படத்தை, 'என்னதான் சொல்லு மாட்டுக்கறி மாட்டுக்கறிதான்யா' என்ற வாசகத்துடன் அவர் முகநூலில் பதிவிட்டிருந்தார். இதைக் கண்ட இந்து மக்கள் கட்சி, அமமுகவுடன், பிற கட்சி பிரமுகர்கள் சேர்ந்து முஹம்மது பைசானை, அவர் வீட்டிற்குள் நுழைந்து கூர்மையான ஆயுதங்களை கொண்டு கடுமையாக தாக்கியுள்ளனர்.

இதில் கை, தோலில் படுகாயமடைந்த அவரை அப்பகுதி மக்கள் மீட்டு நாகை அரசு மருத்துவமனையில் சேர்த்தனர். அங்கு அவருக்கு தீவிர சிகிச்சை அளிக்கப்பட்டு வருகிறது.

இந்நிலையில் இச்சம்பவம் குறித்து கொலை முயற்சி வழக்குப்பதிவு செய்த கீழ்வேளூர் காவல்துறையினர் தலைமறைவாக இருந்த பொரவச்சேரியை சேர்ந்த தினேஷ்குமார், கணேஷ்குமார், மோகன்குமார், அகஸ்தியன் ஆகிய நான்கு பேரை கைது செய்து விசாரணை மேற்கொண்டு வருகின்றனர்.

முகமது பைசான் முகநூலில் தொடர்ந்து இந்து மத ஆதிகத்திற்கு எதிரான கருத்துக்களையும், புகைப்படங்களையும் பதிவிட்டு வந்துள்ளார் என்பது குறிப்பிடதக்கது.