மயிலாடுதுறை:சீர்காழி அருகே வரலாற்று புகழ்மிக்க பூம்புகார் சுற்றுலா தலத்தில் சட்டப்பேரவை மதிப்பீட்டுக் குழுவினர் ஆய்வு செய்தனர். பூம்புகார் சுற்றுலா தலத்தை உலக சுற்றுலா தலத்திற்கு இணையாக மேம்படுத்துவதற்கான பணிகளை செய்திட தமிழ்நாடு சட்டப்பேரவை மதிப்பீட்டுக் குழு தலைவர், சட்டப்பேரவை உறுப்பினர் டி.ஆர்.பி. ராஜா தலைமையில் குழு உறுப்பினர்களும், சட்டப்பேரவை உறுப்பினர்கள் செல்லூர் ராஜூ, அக்ரி கிருஷ்ணமூர்த்தி, அம்மன் அர்ஜுனன், அருள், ராமச்சந்திரன், ஈஸ்வரன், பாலசுப்ரமணியன், ராஜகுமார் ஆகியோர் பூம்புகார் சுற்றுலா தலத்தில் உள்ள சிலப்பதிகார கலைக்கூடத்தைப் பார்வையிட்டு ஆய்வு செய்தனர்.
அவர்களுடன் மயிலாடுதுறை மாவட்ட ஆட்சியர் லலிதா, பூம்புகார் சட்டப்பேரவை உறுப்பினர் நிவேதா. முருகன், சீர்காழி சட்டப்பேரவை உறுப்பினர் பன்னீர் செல்வம் ஆகியோரும் ஆய்வு மேற்கொண்டனர். அப்போது சிலப்பதிகாரக் கலைக்கூடத்தில் முகப்பு மற்றும் சுற்றுப்புறப்பகுதி முழுவதும் செடி, கொடிகள் மண்டி காடு போல் வளர்ந்திருப்பதையும், கலைக்கூடத்தில் உள்ளே கலை பொக்கிஷங்கள் உடைந்து சிதிலமடைந்து பராமரிப்பு இன்றி இருந்ததையும், அதிக அளவு வெளவால்கள் தங்கி கடுமையான துர்நாற்றம் வீசியதையும் கண்டு அதிர்ச்சி அடைந்த மதிப்பீட்டுக்குழுவினர் சிலப்பதிகார கலைக்கூடத்தை இவ்வாறு பராமரிக்காமல் வைத்துள்ளதற்கு சுற்றுலாத்துறை அலுவலரிடம் கண்டனத்தை தெரிவித்தனர்.