15 அடி ஆழத்துக்கு மண் எடுத்ததால் உடைந்த பாலம்: போக்குவரத்து துண்டிப்பு

மயிலாடுதுறை அருகே கோயில் குளத்தில் 15 அடி ஆழத்துக்கு மண் எடுத்ததால், பாலம் உடைந்தது. இதனால் போக்குவரத்தும் பாதிக்கப்பட்டது.

மயிலாடுதுறை: வில்லியநல்லூர் ஊராட்சியில் உள்ள பாலாக்குடி - பன்னீர்வெளி சாலையானது, மயிலாடுதுறை - மணல்மேடு செல்லும் சாலையிலிருந்து பிரிந்து மேலாநல்லூர் வரை செல்கிறது.

இந்தச் சாலை 10-க்கும் மேற்பட்ட கிராம மக்களுக்குப் பிரதான இணைப்பாக உள்ளதால், இதில் அரசு நகரப்பேருந்து சென்றுவருகிறது. மேலும் இந்தச் சாலையை ஒட்டி, 2 ஏக்கர் நிலத்திற்கும் அதிகமான அளவு கொண்ட பாலாக்குடி பிள்ளையார் கோயில்குளம் உள்ளது.

உடைந்த பாலம்

இக்குளத்திற்கும் பாலாக்குடி வாய்க்காலுக்கும் இடையே சிறுபாலம் அமைக்கப்பட்டுள்ளது. கடந்த ஆண்டு இந்த குளத்தைத் தூர்வாரியுள்ளனர். அப்போது 15 அடி ஆழம்வரை தோண்டி இக்குளத்தில் மண் எடுக்கப்பட்டுள்ளது.

இந்நிலையில் 2 நாட்களுக்குமுன் மணல்மேடு பகுதியில் பெய்த மழை நீரும், முன்பே திறக்கப்பட்டு பாலாக்குடி வாய்க்காலில் விடப்பட்ட நீரும், குளத்திற்குள் பாய்ந்துள்ளது.

இதனால் சாலையை ஒட்டி உள்ள குளத்தில் 15 அடி ஆழத்துக்கு மண் எடுத்ததால், பாலத்தின் கீழ்ப்பகுதி வழியாக வேகமாக நீர் செல்லும்போது பாலம் அதன் பிடிமானத்தை இழந்துள்ளது.

பொதுமக்கள் வேண்டுகோள்

அதனால் பாலம் உடைந்தது. இதையடுத்து அப்பகுதியில் போக்குவரத்து அடியோடு நிறுத்தப்பட்டது.

சிறுவாகனங்கள் அருகில் உள்ள மாற்று வழியாகச் சென்றுவருகின்றன.

இதனால் உடனடியாக மாவட்ட நிர்வாகம் நடவடிக்கை எடுத்துப் பாலம் மற்றும் சாலையைச் சரிசெய்து மீண்டும் பேருந்து போக்குவரத்திற்கு ஏற்பாடு செய்யவேண்டும் என்று பாலாக்குடி, பன்னீர்வெளி, மேலாநல்லுர் பகுதி மக்கள் வேண்டுகோள் விடுத்துள்ளனர்.