சிபிசிஎல் ஒப்பந்த தொழிலாளர்கள் மூன்றாவது நாள் காத்திருப்புப் போராட்டம்!

நாகையில் சென்னை பெட்ரோலியம் கார்பரேஷன் லிமிடெட் எண்ணெய் நிறுவனத்தில் பணியிழந்த ஒப்பந்தத் தொழிலாளர்களுக்கு இழப்பீட்டுத் தொகை வழங்க வலியுறுத்தி மூன்றாவது நாளாக ஒப்பந்தத் தொழிலாளர்கள் காத்திருப்புப் போராட்டத்தில் ஈடுபட்டனர்.

நாகப்பட்டினம்: நாகை மாவட்டம் பனங்குடியில் சென்னை பெட்ரோலியம் கார்பரேஷன் லிமிடெட் எண்ணெய் சுத்திகரிப்பு நிலையம் அமைந்துள்ளது. பொதுத் துறை நிறுவனமான சிபிசிஎல் நிறுவனத்தில் பனங்குடி, உத்தமசோழபுரம், நரிமணம், திட்டச்சேரி பகுதியைச் சேர்ந்த 100-க்கும் மேற்பட்டோர் ஒப்பந்தப் பணிகளில் ஈடுபட்டுவந்தனர். இந்நிலையில் சிபிசிஎல் ஆலை விரிவாக்கத்திற்காக, அங்கு பணிபுரிந்த ஒப்பந்தத் தொழிலாளர்கள் தற்காலிகமாகப் பணிநீக்கம் செய்யப்பட்டனர்‌.

பணிநீக்கம் செய்யப்பட்ட ஒப்பந்தத் தொழிலாளர்களுக்கு உரிய இழப்பீடு வழங்க வேண்டும் என வலியுறுத்தி, நாகை பனங்குடி சிபிசிஎல் ஆலையின் உள்ளே, நூற்றுக்கும் மேற்பட்ட ஒப்பந்தத் தொழிலாளர்கள் இன்று (ஜன. 06) மூன்றாவது நாளாக காத்திருப்புப் போராட்டத்தில் ஈடுபட்டுவருகின்றனர்.

இதில் பாதிக்கப்பட்ட தொழிலாளர்களுக்கு சிபிசிஎல் நிர்வாகம் உரிய இழப்பீட்டுத் தொகை வழங்க வேண்டும் என்று கோஷங்களை எழுப்பினர்.

இந்தியன் ஆயில் கார்ப்பரேஷன் தொழிலாளர்களுக்கு அந்நிறுவனம் இழப்பீட்டுத் தொகை வழங்குவதுபோல், தங்களுக்கும் சிபிசிஎல் நிர்வாகம் உடனடியாகப் பணிநீக்கத்திற்கு வழங்க வேண்டிய இழப்பீட்டுத் தொகையை வழங்க வேண்டும் என்றும் அவர்கள் வலியுறுத்தியுள்ளனர்.

இதையும் படிங்க: அம்மா மினி கிளினிக்கில் மருந்தாளுநர்களை நியமிக்க கோரிய வழக்கு தள்ளுபடி!